Kan beisei ang zat a la ni lo - Inter director

Inter Milan director Piero Ausilio chuan Manchester United-in keeper Andre Onana chungchangah an dawr thu a sawi chhuak a, an lei tumna erawh an beisei zat a la phak loh thu sawi.

Ausilio chuan, "Tun dinhmunah chuan Andre hi kan goalkeeper a ni a, kan player pawimawh a ni. Amah hi chelh kan duh a, thil awm dan tur erawh hunin a hril ang. Min dawrna hi kan beisei ang zat a la ni pha lo a, chuvangin Onana hi July 13-a kan zinga pre season ṭan turin kan beisei ang," tiin a sawi.

Manchester United-in Premier League golden glove dawng hlim David de Gea contract thar an ziahpui lo a, Erik ten Hag-a'n Ajax-a a enkawl tawh Onana hi Spanish keeper thlak nan a duh. English club hian Inter hi euro maktaduai 40 bakah a chet ṭhat dan a zira euro maktaduai nga pek an inhuam a, Italian club hian an hnawl.

Red Devils leh Inter hi an indawr chhunzawm dawn a, Onana dinhmun erawh a chiang. Club pahnih hi an inrem a nih chuan Old Trafford pan a duh. Khawthlang lam media ṭhenkhat chuan club pahnih hian inremna an zawng a, euro maktaduai 52.5 (£45m) bawr velah an inrem theih an ring.

Man United hian Mason Mount an lalut tawh a, Onana an beisei leh mek. Nimin lam boruak thlir chuan he thu i chhiar meuh chuan Inter leh United hi an inrem hial thei bawk.