Usyk-a'n Dubois lakah title hum dawn

Heavyweight world champion Oleksandr Usyk chuan WBO, WBA (Super) leh IBF title chu British boxer Daniel Dubois lakah a hum a ngai. August 26 hian Wroclaw, Poland hian boxer ṭha pahnih hi an inhmachhawn ang.

Ukrainian boxer Usyk hi kum 36 mi a ni a, Dubois nen an inhnekna tur hi mi 24,000 lenna Tarczynski Arena a ni ang. Kum 25 mi Dubois hi WBA (Regular) belt kawltu a ni a, fight 19 a hmachhawn tawhah vawi 18 a khingpui a knockout - vawi khat a chak lo thung.

Dubois chuan, "Fighter ropui a ni a, amah hi ka zah. Mahse, tun hi ka hun a ni. Khawvel ka barakhaih dawn a, mipuiin Daniel Dubois ṭhatzia hi an hria ang," tiin a sawi.

Usyk erawh vawi 20 professional fight a hmachhawn tawhah a la chak vek a, tun ṭum hi unified title vawi hnih a humna tur a ni. Ukranian boxer Usyk chuan, "Ukraine puitu Polish mipuite chungah thinlung takin lawmthu ka sawi. Poland hi kum sarih liam taa world title ka lakna hmun kha a ni a, he ram ngeia ka inhnek leh thei tur hi ka lawm," tiin a sawi ve bawk.