Kylian Mbappe hma hun a chiang lo; Chhuak mai thei dinhmunah a ding ta!
Paris Saint Germain-in coach thar an nei a, indinthar an tum bawk - club president Nasser Al-Khelaifi pawh a ṭawng a pawr nghal a, Kylian Mbappe chu a hma hun tichiang thuai turin a ti! France international hi Paris club aṭanga chhuak mai thei dinhmunah a ding.
Al-Khelaifi sawi dan chuan Mabppe hian a hma hun tihchian nan chawlhkar khat emaw, chawlhkar hnih emaw bak hun a nei lo - tun nipui bazar tingaihnawm zualtu a ni ngei dawn.
A bul chu
Nipui bazar hmasa khan Mbappe hi nasa takin Real Madrid nen sawizawm an ni a, mahse hun tepter tawh takah Paris Saint Germain tan contract a pawt sei leh ta zawk a ni.
A contract neih lai hi tun season thar lo awm tur tawp ruala zo ve mai tur a ni, club leh player an inrem dan chuan a contract ziak hi a zawh hunah kum khat atan pawhsei leh theih turin an ruahman.
Mahse, Mbappe hian tun hnai khan kum khat dang atana pawh sei theih hi pawh sei a tum loh thu a sawi chiang, hetiang a nih chuan nakkum nipui bazarah chuan man nei loin a chhuak thei dawn tihna a ni.
France international hian khawvel hriatah a ngaihdan a sawi chiang a, club lam erawh an ngawi reng thung. Nilaini zan khan club thuneitu lam an rawn ṭawng chhuak ve ta a, tunah chuan buaina chinfel tur a awm ta.
Hun an pe
An player chungchang sawiin PSG president Nasser Al-Khelaifi chuan, "Kan dinnna chu a chiang viau - Kylian Mbappe hian kan hnena cham zel a duh a nih chuan contract thar a ziak tur a ni ang.
"Tun dinhmuna khawvela player ṭha ber hi man nei loa chhuahtir ngawt kan tum lo," a ti a, an player nen hian a thuphunga inremna an lo neih tawh thu leh, a ngaihdan a thlak tak avangin an thiam loh a nih bik loh thu a sawi bawk.
Nasser Al-Khelaifi chuan sawi zawmin, "Kylian Mbappe hian a hma hun hi chawlhkar khat emaw, chawlhkar hnih chhung emawin a tifel tur a ni, hei aia rei chu a remchang lo ang.
"Contract a ziak duh lo a nih chuan a chhuahna turin kawngka a inhawng, tu mah hi club aia lian an awm lo, chumi zingah chuan kei ngei pawh hi ka tel," tiin thu dengkhawng tak a sawi.
PSG leh Mbappe
Mbappe hian AS Monaco aṭangin Paris Saint Germain hi kum 2017 khan a zawm a, a man zat hi chiang taka tarlan ni lo mah se khawthlang media-te chuan pound maktaduai 165.7 niin an sawi.
Paris club tan hian inelna hrang hrangah match 260 aṭangin goal 212 a khungsak tawh a, tun hnai season nga chhung chu a zawnin Ligue 1 goal khung hnem ber a ni ziah.
Season ruk chhungin PSG hi Ligue 1-ah vawi nga an champion thei - France ram chhung football inelna bik chu an awp hneh hle a, an chunga leng tumah reng an awm lo.
Mbappe hi a chhuak a nih chuan a hmun ruak hnawh khat thei tur lak a harsa ang, club khelh dan phung thiam leh theihna nei sang bik a ni a, chutihrualin club dang nena sawi zawm theih reng player neih fo hi a ṭha lo thei bawk.
Chhuak dawn ta se
Real Madrid chu Mbappe-a khelh châkna leh a kal duhna ber a ni tih a chiang tawh - Spanish club lian hian lakluh tum pawhin hma an lo la tawh ngei mai, tunah tak erawh chuan an 'Ngawi' rih tlat.
An striker ṭha leh captain ni bawk Karim Benzema a chhuak a, tlarhma lama khel tur an mamawh. Chutihrualin, tun hma angin Real hian an duhtawk maia sum hman tur an nei bik lo niin a lang.
Tun nipui bazar chhungin Jude Bellingham chu man tam takin Borussia Dortmund aṭangin an lalut tawh a, an neih sa Vinicius Junior chu tlarhma lama rinrawl ni turin an ringtawk hle ni pawhin a rin theih.
Real Madrid hian a theih phawt chuan Mabppe hi lak ngei an duh ang, amaherawhchu club induh ve tawk tak an nih bakah PSG lamin chhuak tura an nawr a nih ngat chuan sum hautak lo deuh zawka lak dan an ngaihtuahin a rinawm.