Grass-ah Swiatek a buai rih lo

Tennis khelhna hmunhma a inang lo hlawm a, hmeichhe world number 1 Iga Swiatek hi clay court-a inkhel thiam bik a ni - Wimbledon khelh laiah Polish nula hian harsatna a la nei hran lo.

Nilaini zan khan grass court inelna lian berah hian second round khelh a ni a, seeded pakhatna Swiatek hian Sara Sorribes Tormo chu 6-2, 6-0 a sawp chungin third round a inhlangkai.

Kum 22 mi Swiatek hian All England Club-ah hian tun hma chuan fourth round a la kalpel ngai lo, tun season erawh match hnih a khelh tawh chinah harsatna a nei lo a, nuamsa tak ve vein a chak.

Grand Slam vawi li champion tawh Swiatek chuan, "A nihna tak sawi chuan Wimbledon hi inringtawk taka khelh a harsa ka ti, kumin erawh a boruak pawh a danglam ta hle.

"Grass court tournament lamah inbuatsaihna ka nei a, chu chuan nasa takin min pui. Tun hma lama ka khelh tawh dan ka chhui kir a, kuminah chuan inkhelh a awlsam tawh hle," tiin hma a sawn tih a sawi.

Swiatek hi player ṭha bik a ni a, hun rei tak chhung world number 1 dinhmun pawh a luah tawh. A match hmasa zawka Zhu Lin-i a hneh ṭum khat game li chiah a hloh a, match hnihnaah pawh game hnih bak a hloh lo.

Inkhel dangah beisei loh tak result kan hmu, seeded pariatna Maria Sakkari chu world number 36 Marta Kostyuk lakah 0-6, 7-5, 6-2 a chak loin second round lekah a zinkawng a tawp.

Sakkari hian inkhel tir lam chu a thunun hneh hle, game hloh miah loin set khatna pawh a la. Mahse, ruah surin inkhel a ti khaihlak fo a, ruah kar laka an inkhelh chhunzawmnaah a chesual ta zawk a ni.

Wimbledon khelh laiah American player chesual an tam ta - Sakkari hma hian seeded sang zinga mi Coco Gauff chu hneh nei loin a lo tla nghal tawh a, tawnhriat nei tam Venus Williams pawhin chak ni hmel a hmu lo.

World number 2 hlui Anett Kontaveit erawhin Lucrezia Stefanini chu 6-4, 6-4 in a hneh. Estonian nula Kontaveit hian Wimbledon zawh rualin tennis a chawlhsan tur thu a sawi lawk tawh a, match khat chu a la khelh belh leh rih dawn tih a chiang.

Inkhel dangah kum 2017 US Open champion Sloane Stephens chuan Rebecca Peterson 6-2, 6-3 in a hneh a, kum 16 mi Mirra Andreeva chuan Chinese nula Wang Xiyu lakah 6-4, 3-6, 7-5 in hnehna a chang ve bawk.

Kum 2021 Wimbledon finalist Karolina Pliskova chu hneh nei loin a tla, a match hmasa berah amah aia ranking 206 tehmeuha hniam zawk Natalija Stevanovic lakah 6-2, 6-3 in a chak lo.

Seeded 13-na Beatriz Haddad Maia, Wimbledon semifinalist Jelena Ostapenko leh Romanian nula Sorana Cirstea te erawhin an khingpui ṭheuh an hneh a, seeded pakuana Petra Kvitova pawhin Jasmine Paolini hnehin second round a lut bawk a ni.