PSG coach thar Luis Enrique

Paris St-Germain-in intuaihriam hna an thawk ṭan mek–coach atan Luis Enrique an lakluh thu an puang a, Spanish coach hian French club hi kum hnih chhung enkawl turin contract a ziak.

PSG hian season khat hnu lekah coach Christophe Galtier chu a hna aṭangin an chawlhtir a, a hmun ruak luah turin Barcelona boss hlui Enrique an lalut zui–Spanish coach hoin European football thunun theih an inbeisei ang.

Enrique chuan, "Nomawi chawi tur team he hmunah hian ka din thei ang tih ka ring a, PSG fan-te lawmna tur ka thlen thei ang tihah hian ka inringhlel lo," a ti a, Spain boss hlui hi a inringtawk hle.

Hetihrual hian kum 53 mi coach hian May 2017-a Barcelona a chhuahsan hnuah club enkawl a nei leh tawh lo a, club football-ah eng ang taka theihna sang nge a la neih tih chu hrilh hriatin kan awm thuai dawn e.

Mangṭha Galtier

PSG hian Enrique an lakluh hmain coach Galtier an ban a, Mauricio Pochettino thlaktu manager hian season khat a enkawl chhungin Ligue 1 nomawi chawipui mah se season an khar danah French club thuneitute an lungawi tawk lo.

Paris khaw club hian season hman zawh takah khan match 22 chhung tlawm nei loin season bul an ṭan a, an boruak pawh a sang hle. Mahse, season laihawlah World Cup khelh a ni a, mahse, World Cup zawha inelna hrang hrangah vawi kua ngawt an tlawm.

Season a tawp meuh chuan PSG hian pahnihna Lens aia point khata hmu sangin, champion nomawi an chawi hram a, PSG-ah chuan hei hi a ṭha tawk lo–Galtier ban a ni a, a hmun ruak luah turin Enrique lakluh a ni ta.

PSG chuan, "Paris St-Germain chuan Christo-phe Galtier leh a thawhpui, assistant Thierry Oleksiak leh Joao Sacramento te chungah season tluana an hnathawh ṭha tak avangin lawmthu a sawi a ni," an ti.

Hei le Enrique

Player a nih lai pawha rorum tak kha a ni a, Enrique-a'n coach a nih hnuah a mizia a thlak thut lo–miin sawisel mah se a ngaihdanah a ding nghet tlat a, a kal dan a thlak phah ngai lo. Hei tak hi club neitu inrawlhna nasa tak PSG-ah hian a fuh ang em, tih chu zawhna lian tak a ni.

Barcelona B team aṭanga a coaching career ṭantu Enrique hian AS Roma, Celta Vigo leh Barcelona chu club a lo enkawl tawh a ni a, a hming chherna tak chu Barca a ni. Player a nih lai pawha a khelhna Catalan club-ah hian 2014-17 inkar kha a awm a, nomawi pakua a chawi hman!

Enrique hian Barcelona-a a season hmasa berah hian treble champion a nihpui nghal a, Champions League, La Liga leh Copa del Rey-ah te nomawi a chawi vek–hemi hnuah hian La Liga (1), Copa del Rey (2) leh Spanish Super Cup (1) a chawipui leh a, UEFA Super Cup leh FIFA Club World Cup-ah 2015 khan nomawi a chawipui bawk.

Barca a chhuahsan hnuah Spain a enkawl a, Euro 2020-ah squad-a player 26 neih theih a ni chungin player 24 chiah a thlang a, semifinal a thlenpui. World Cup 2022-ah last 16 aṭangin an tla a, Morocco an ngam lo–a hna aṭangin a bang zui a, PSG boss a ni dawn ta.

Attacking football

Enrique hrechiangtute tan beisei tur dang a tam lo–Spanish coach hian ball chan tam bawk chu a thupui leh dawn tih a chiang a, PSG hmanga attacking football hmuhnawm phochhuah a tum dawn a ni.

Player a nih laia khawvela club inhal ber pawl Real Madrid leh Barcelona tana khel thei Enrique chuan, "Attacking football hi ka kalphung a ni a, hemi chungchang hi chu sawi buai theih a ni lo," a ti hmiah!

Enrique chuan sawi zawmin, "Player-te mila inher rem pawh a ṭul ve bawk a, ka player-ten a mimal leh team anga a ṭha thei ang bera an khelhchhuah theih nana puih hi ka hna chu a ni," a ti a, a hnathawh tur a hrechiang.

Chelsea nen pawha indawr hman Enrique hian a 'philosophy' hi PSG-ah a hlawhtlinpui thei ang em, tih chu chhanna pek harsa tak a la ni rih–Ligue 1 hi chu an thunun sa a ni a, European football-a a thlenpui chin hi a hlawhtlin leh tlin loh teh nan hman a ni ang.

Kalphung thar!

PSG neituten French club an lei tirha an châk ber chu European football-a rorel a ni a, mahse, an la hlawhtling thei lo. Nipui transfer apiangin player langsar tak tak an lalut reng a, kum 2021 nipui transfer phei kha chu pui tak a ni.

Khawvel nghawrnghing dawt khawpin Lionel Messi chu Barcelona aṭangin an lalut a, Real Madrid captain hlui Sergio Ramos pawh thlem lutin, Italian keeper langsar Gianluigi Donnarumma, European club liante rim rawn Achraf Hakimi leh Liverpool hlawhtlinpuitu Georginio Wijnaldum te ho a rualin an han la tehreng a nih kha!

Khatihlaia PSG fan-te lawmna chu sang tak a ni–mahse, PSG-in Ligue 1 lamah nomawi chawi chhunzawm mah se European football-ah erawh eng an ang chuang lo a, kalphung thara kal tumin tun season-ah an insiamṭha mek.

PSG hian player langsar pui pui ringawt lalut loa team thar din an tum a, mahse, he an tumna tihlawhtling tur hian team boruak a ṭhat phawt a pawimawh–tun dinhmunah Kylian Mbappe leh Neymar te hma hun a chiang lo.

Beiseina

PSG president Nasser Al-Khelaifi chuan, "Enrique kan lakluh hian kalphung thar leh khelh dan phung thar a rawn keng tel ang," a ti a, Spanish coach hoa an team kalphung thlak danglam an tum thu an sawi.

French club hian season dang angin tun nipuiah pawh player langsar tia sawi vul chuk tur lakluh an la nei lo a, star player rual lei khawm chunga hlawhtlinna zawn an sim deuh niin a lang.

Chutihrual chuan he team hian hming langsar tak tak Donnarumma, Hakimi, Marquinhos leh Marco Verratti te ho an la kawl a, Mbappe leh Neymar an cham bawk chuan team enkawl hautak tak chu an la ni thoin a rinawm.

Mahse, tarlan tawh angin Enrique hian 'star player' a hre ve vak ngai lo a, mahni thu duh tak a nih avangin player langsarten an hmingthanna hman remchang an tum a nih pawhin an tan awmzia a nei thui lo mai thei!