Euro U21: Israel ngamtu England-in final an lut
UEFA European Under-21 Championship 2023 pawh a hmawr bawk a hnai ta - England Under-21 chuan kum 2009 hnua a vawi khat nana final lut turin Israel U21 chu 3-0 in an hneh a, final an inpetkai.
Three Lions tan hian Morgan Gibbs-White chuan minute 42-na lekah goal hmahruai khungin, Manchester City attacking midfielder Cole Palmer leh Aston Villa forward Cameron Archer te chuan goal khat ve ve an khung bawk.
Israel lamin a chhanletna tur an neih loh avangin Young Lions an tlang a, semifinal lehlama 5-1 ngawta Ukraine sawptu Spain U21 nen final-ah champion inchuhin an intawng ang.
Hei le England
Adjarabet Arena, Batumi-a inkhelah England-in inkhel ṭantir aṭangin game an thunun nghal a, an vanneih ṭum ni se hma taka hmahruai theihna remchang an nei tawh - mahse, Arsenal rawlthar duhawm Emile Smith Rowe chance neih duhawm chu goal line aṭangin an lo pet chhuak hman.
Hei chauh a ni lo - Newcastle United forward Anthony Gordon chu Israel defender Karm Jaber chuan a titlu a, penalty a hlawh chhuak. Mahse, Gibbs-White chuan minute 17-naa an penalty hmuh hi goal-ah a chantir thei lo.
Nottingham Forest midfielder hi a indawmkun reng lo. Minute 42-naah Palmer-a siamsak chu goal-ah a chantir ta tho a, goal dang lut loin chawlhlawk an hmang zui.
A hming Palmer
Manchester City-in coach atan Pep Guardiola an nei a, a duh ang zawng player lei nan sum an nei bawk - hetiang karah hian academy aṭangin player ṭha tak tak an chher chhuak reng bawk a, he team hma hun hi a thim mawlh lo.
Euro U21 semifinal-ah pawh City player Palmer a hmuhnawm a, Gibbs-White goal khung tur a siamsak hnuah Young Lions tan goal a khung ve leh - minute 90-naah Archer-a khung tur a siamsak bawk.
Palmer hi England goal khung pathumah a inrawlh vek tihna a ni a, final an luh theih nan tha a thawhhlawk takzet - kum 1984 hnau a vawi khat nana champion turin England-in kawng dik an zawh mek zel e.
England an ṭha
Young Lions squad hi en ila, champion turin an ṭha tawk - semifinal-a Israel laka goal khungtu player-te en ila, Premier League club tana khel, English top flight league-a tawnhriat nei vek an ni a, an ngaihtuahawm lo hle.
Player of the match atana thlan Curtis Jones pawh a khel a hmuhawm takzet a, ani pawh Liverpool ṭhat vanglai pawha khel phak ve reng a ni a, Smith Rowe leh Gordon te an la awm a, bench aṭangin Harvey Elliott te an la luhtir thei cheu!
A tawi zawnga sawi chuan tuna England squad-a player tam zawk hi ram dang senior team tana khel phak tur khawpa tawnhriat nei ṭha tawh an ni a, champion an beisei a nih pawhin a mak lo ang.
Hei le Spain
England ṭhatzia kan sawi zo chiah a, final-a he team dang thei tur hi an awm a nih ngai chuan Spain an ni ang - anni hian semifinal inkhel dangah Ukraine chu 5-1 ngawtin an sawp a, semifinal pawh an la ngam rih hle!
Ukraine tan Artem Bondarenko chuan minute 13-na lekah goal hmahruai a khung a, mahse, Spain chhaih kawlhna goal lek a lo ni! Spain hian first half chhungin Portuguese club Braga forward Abel Ruiz leh Athletic Bilbao attacking midfielder Oihan Sancet hmangin an chhanglet.
Second half-ah pawh Spain an insum lo - Real Madrid defensive midfielder Antonio Blanco, Osasuna midfielder Aimar Oroz leh Manchester City wingback Sergio Gómez hmangin an khung belh a, 5-1 a hnehna changin final an lut chiang hle.