Atletico Madrid defender thar Soyuncu

Turkey defender Caglar Soyuncu chuan Leicester City-a a contract a hman zawh hnuin La Liga lam a hawi a, Atletico Madrid chu kum li chhung khel turin a zawm–June khan King Power Stadium-a a contract a hman zawh tawh avangin free transfer-a a duh lam club pan turin zalenna a nei a ni.

Soyuncu hian August 2018 khan Leicester City hi SC Freiburg aṭangin a zawm a, pound maktaduai 18 man niin a khelh ṭhat dan a zira pound maktaduai 20 thlenga sang chho thei tura tih a ni–mahse, season hman zawh takah khan Foxes hi a relegate-pui.

Kum 27 mi centre back hian Foxes tan match 132 khel hmanin, goal li a khung a, assist vawi khat a nei. Season hman zawh takah relegate pui mah se, kum 2021 khan FA Cup-ah a champion pui a, FA Community Shield nomawi an chawi bawk.

Soyuncu hi Foxes tan defender pawimawh niin, 2019-20 seaosn-ah phei chuan PFA Premier League Team of the Year-ah a lang phak hial a, kum 2019 khan Turkish Footballer of the Year atan thlan a ni bawk a ni.

Mahse, season hman zawh takah khan coach ban tak Brendan Rodgers hnuaiah a khel phak lo a, Northern Irish coach ban a nih a, coach lailawk atana Dean Smith lak a nih khan Foxes tan a khel phak ve leh chauh.

Season tawp lamah a inhliam zui a, an match hnuhnung pathumah a inlan thei lo–Turkey tana vawi 53 inlan thei defender hian theihna a nei sang tih chu tlang hriat a ni a, khawvela coach langsar ber pawl Diego Simeone hnuaiah enge a an zel dawn, tih chu hunin a hril ang.