India aiin World Cup a pawimawh - Shaheen Afridi

Cricket World Cup chu kumin October thla hian India-in a thleng dawn a, ram inhal pahnih Men in Blue leh Pakistan te October 15, Pathianni hian an inkhel ang. Inkhelh hun hi October thla daih ni mah se boruak a sang tawh hle.

Pakistan bowler Shaheen Afridi chuan, "India leh Pakistan inkhel tur chauh kan ngaihtuah thiang lo, hei chu match khat ve mai a ni. World Cup nomawi chawi kan tum zawk tur a ni a, chu chu team anga kan tum tur pawh a ni," tiin a sawi.

Shaheens hian June thla khan Sri Lanka nena Test match khel tur player 16 awmna squad an puanga a, Afridi pawh hi a tel. Kum 23 mi Afridi hi khup hliam vangin nikum July thla khan Sri Lanka a hmachhawn thei lo a, Pakistan-in Australia, England leh New Zealand an mikhual ṭumin a tel thei lo bawk.

Tunah erawh Afridi hi a dam ṭha leh tawh a, Pakistan Super League-ah pawh inlanin kumin kumtira New Zealand nen T20 leh ODI series an khelh ṭumah pawh a inlan a ni.

Kumin Cricket World Cup hi khawpui 10-ah khelh a ni dawn a, Narendra Modi Stadium-in India leh Pakistan inkhelh tur bakah final a thleng dawn. Semifinal hi Mumbai leh Kolkata-ah khelh tur a ni a, India hi semifinal an lut a nih chuan Mumbai-ah an inkhel dawn. Chutihrualin semifinal-a an khingpui tur hi Pakistan a nih chuan Kolkata-ah sawn a ni thung ang.

Kum 2016 T20 World Cup-ah pawh khan Pakistan leh India inkhel tur chu Dharamsala khelh tur ni mah se player-te himna ngaihtuahin Kolkata-ah sawn a ni tawh bawk.