India camp aṭangin Jeremy-a a chhuak: Olympic beiseina a la bo lo – MWA President
Weightlifting Federation of India (IWLF) president Sahdev Yadav chuan India camp aṭangin Jeremy Lalrinnunga a chhuah thu a sawi a, he thu hian India media a luah nasa hle–Mizo tlangval hi Paris Olympic 2024 khel lo thei dinhmunah a ding mek.
Mizoram Weightlifting Federation (MWA) hnen aṭanga Vanglaini thu dawn dan chuan, thu inhriatsual palh leh kal fuh lo palh a awm niin a lang a, infiamna khawmpui lian bera inlan turin Jeremy-a tan beisei a la bo lo tih kan dawng.
Paris Olympic chungchangah hian Indian Olympic Association (IOA) leh Weightlifting Federation of India (IWLF) te chuan, nimin tlai thleng kha chuan thuchhuah an la siam lo a ni.
Hliam leh buaina
Commonwealth Games 2022 neih lai khan Jeremy Lalrinnunga hian hliam a tuar a, chumi hnuah erawh in enkawl damin training pawh a zawm pangngai leh thei tawh, a hnu lamah erawh a ban dinglam leh nghawng hliam vangin a chawl zui leh a ni.
September-October hian Asian Games neih tur a ni a, hemi bakah hian Weightlifting World Championship neih tur a ni bawk. Inelna hmachhawn tur hian India team pawhin inbuatsaihna an nei–June 30 khan India aiawh thei tur thlanna (trial) hi Patiala-ah an buatsaih.
IWLF Sahdev Yadav chuan, "June 30 khan India aiawh tur thlanna neih a ni a, he hunah hian Jeremy a inlan lo. Chuvangin July 1, Inrinni aṭang khan India camp aṭanga paih a ni. A hliam enkawl turin USA lama kal tur a ni a, mahse a kal lo," a ti.
October thlaa khelh tur Asian Games hi Paris Olympic 2024 atana qualifier a ni nghal dawn a, hei bakah hian Weightlifting Championship a la awm dawn bawk. Heng inelnate hi Olympic khel tura kalkawng pawimawh a ni.
Yadav chuan, "Enchhinna nei lo infiammi chu inelna hmachhawn turin kan tir thei lo," a ti. Jeremy-a bakah hian hliam vangin Sanket Sargar pawhin trial a hmachhawn thei lo–Olympic medal la tawh Mirabai Chanu hliam pawh US lama enkawl a ni bawk.
Thil nihna chu
Tun hmain Jeremy Lalrinnunga hliam hi USA lamah enkawl a lo ni tawh, hemi ṭum hian Mizo rawlthar chuan, "Ka dam phah lo a, a nihna takah chuan hliam nei reng chungin India ramah ka haw leh a, chumi hnuin Mumbai-ah min enkawl dam," tiin Vanglaini a lo hrilh tawh.
Mumbai lama amah enkawl tawh ṭhintu Dr Bhatia bawk hian tun ṭum a hliam pawh hi a enkawl. Weightlifting Federation of India (IWLF) lam chuan USA-ah bawk inenkawl turin an duh a, mahse amah hrechiangtu leh enkawl dam tawh ṭhintu zawk kianga hun hman hi a thlang.
Mizoram Weightlifting Federation president Lallianṭhuama chuan, "Thil thlen dan engkim hi Jeremy-a hian chief coach Vijay Sharma hnenah a hrilh vek a, ani hian IWLF hnenah a lo hrilh chhawng leh thung, hei hi tun hma lam aṭanga thil kalphung pawh a ni.
"IWLF president Sahdev Yadav ka zuk bia a, ani chuan Jeremy-a hi thla khat leh a chanve chhung a chawlh tur thu leh, chumi hnuah training tura a kir leh mai tur thu min lo hrilh," tiin Vanglaini a hrilh a, Mizo tlangval tan Paris Olympic beiseina a la bo lo.
A la tawp lo
Weightlifting Federation of India (IWLF) lamin Asian Games khel tur zawnna huna Jeremy-a tel tura an beisei hi Mizoram Weightlifting Federation lam chuan an hrethiam lo, a chhan chu Commonwealth Games lama a sulhnu aṭangin Asian Games atan hi chun a tling tawh sa a ni.
A hliam vangin thla khat chuang a chawl a nih erawh chuan September thlaa neih tur Asian Games atan hian inbuatsaihna hun a nei tlem deuh dawn tihna a ni a, a tan medal hlawh chhuah a harsa mai thei–a sulhnu enin thil theih loh erawh a ni hran lo.
July 13 hian India rama weightlifting thuenitu sang IWLF chuan ram chhunga state hrang hrang weightlifting hruaitute a ko khawm dawn a, he hunah hian Mizoram aṭang pawhin President leh Secretary an kal dawn.
MWA president Lallianṭhuama chuan, "Thil pawimawh hrang hrang kan sawi khawm dawn, he hunah hian hmai chhan ngeiah Jeremy Lalrinnunga chanchin leh thil nihna tak hi India ram huap hruaitute ka sawipui ang," tiin Vanglaini a hrilh.