Lungleiin Lianzuala chawimawi

AIFF Player of the Year atana thlan thar Lallianzuala Chhangte chu July 8, Inrinni khan Lungleiah ropui takin an hmuak. Lunglei tlangval hian SAFF Championship-ah India a champion pui a, final-ah goal pawimawh khungin penalty shootout-ah a khung leh bawk. Lianzuala hian chawimawina hi a phu a ni.

Mumbai City forward Lianzuala hi AIFF Player of the Year atana thlan a ni theih nan hian ISL 2022-23 Hero of the League-ah thlan a ni a, Hero Tri-Nation Series-ah India champion puiin Player of the Tournament-ah thlan a ni a, FPAI Indian Player of the Year-ah thlan a ni bawk.

Lianzuala hmuahna hun hi Lunglei DFA buatsaih a ni a, Pukpui Centenary Ṭawngṭaina hmunah Lunglei mipui ṭhahnem takin lirthei nen an lo hmuak a, function tawi hman zawhah Leitlang Lightning Bullet Club leh Royal Knight te kaihhruainain Lunglei khawpui chhung fanpui a ni.

Lunglei DFA hian Lianzuala pualin Inrinni zan khan Tourist Lodge, Zotlangah hun an hmang leh a, chawimawina thuziak an hlan. Lianzuala hi Mizote chauh ni loin India ram hmachhuan a ni mek.

Mumbai City hi thla thar August 3-a khelh ṭan tur Durand Cup-ah an tel dawn a, Lianzuala pawhin chawlh a hmang rei thei dawn lo. Tunkar hian training nei turin Mumbai a pan ang.