Zverev leh Murray zinkawng a tawp

Wimbledon champion tura rinkai zinga mi Alexander Zverev leh Andy Murray te chu an tum ram thleng zo loin an tla, hetihlai hian world number 1 Carlos Alcaraz erawhin last 16 a inhlangkai thung a ni.

Alcaraz hian quarterfinal lut tur chuan Matteo Berrettini a hneh leh a ngai dawn, Italian tlangval Berrettini hi Zverev hnehtu a nih avangin Spanish star tan awlsam taka paltlang ngawt theih a ni dawn bik lo.

Zverev a tla

Theihna a nei sang a, player beiseiawm berte zinga mi pawh a ni–mahse Alexander Zverev tan Grand Slam nomawi chawi a harsa. Inrinni zan third round inkhelah 2021 finalist Berrettini chu 6-3, 7-6 (7-2), 7-6 (7-5) in a hneh lo.

Set hnihna an khelh laiin ruah a sur a, hei vang hian Court One chung khuhna hman a ngai–a chung khuhna hman a nih hian boruak a danglam a, inkhel kalhmang pawh a danglam theih phah ṭhin.

Tun season hmang ṭha lo zawk Berrettini chu khel hmuhnawm leh hlauhawm zawk a ni a, dul hliam vanga kumina match 14 chauh la kheltu hian inkhel boruak sangah tun hma lama Wimbledon final lut tawh a nihna a lantir.

Kum 27 mi Berrettini chuan, "Season hmasa khan Wimbledon hi ka khel thei lo a, hrehawm ka ti hle. Kuminah pawh ka inhnukdawk leh teuh hle, tournament ṭan dawna ka dam hman avangin ka lawm," a ti.

Hmabak Alcaraz

All England Club hi Carlos Alcaraz tan pawh hmun nuam a ni chho mek–seeded pakhatna hian Centre Court-ah seeded 25-na Nicolas Jarry chu 6-3, 6-7 (6-8), 6-3, 7-5 a hnehin last 16 a lut–Wimbledon a khelh tawha a thlen san ber ṭum a ni.

Kum 20 mi Alcaraz hian game sarihnaah a khingpui service chhuhsakin set hmasa ber a la, set hnihnaah erawh tie break an khelh hnuin a che fuh lo zawk–set hnuhnung pahnihah chuan buaina lian tak tawk loin a tlang.

Alcaraz nen quarterfinal an khelh leh tur thlir lawkin Berrettini chuan, "Kan intawn hmasak ber khan Carlos hi player ṭha leh danglam tak a ni tih ka hre nghal tawh a, chuvangin tun ṭuma kan inkhel tur pawh hi a hmuhnawm dawn.

"Engtiangin nge ka khelh dawn tih chu ka sawi lawk thei lo, world number 1 hneh tur erawh chuan ka theihna zawng zawng bakah vanneihna ka mamawh tel dawn a ni," tiin a sawi, tawnhriat ngah zawk a nihna hman a tum ang.

Mangṭha Murray

Britain fachuam a ni a, tennis ngainatna ram an nih avangin an tana Andy Murray hlutna hi a sang. Mahse, an player duhtak hian Wimbledon a khel leh thei ang em, tih hriat a ni ta lo–Stefanos Tsitsipas hneh loin second round a paltlang zo lo a ni.

Ningani zanah an inkhel ṭan tawh a, mahse Wimbledon kalphungah hian anmahni lama zan dar 11:00 thleng bak an khel ngai lo, hei hi 2009 aṭanga an kalpui tawh a ni–Zirtawpni zanah an inkhel hi chhunzawm lehin 7-6 (7-3), 6-7 (2-7), 4-6, 7-6 (7-3), 6-4 in a chak lo.

Grand Slam vawi thum champion tawh Murray hi kum 36 mi a ni tawh a, a vanglai a pelh tawh bakah hliamin a tibuai ngun ta hle. Tun season pawh clay court-ah a inkhel miah lo a, grass court-ah inkhel mah se beisei a phak thei ta lo a ni.

Murray chuan, "Tournament aṭanga hma taka tlak hi chu a nain a hrehawm ṭhin, ka tana match hnuhnung ber a ni dawn em, tih erawh ka sawi thei lo. Phurna leh thathona ka la neih dan a zir a ni ang," tiin a hma hun chungchang a sawi.