Nomawi nena bul ṭan Khatla TBL

Mizoram Basketball Assocaition hnuaia club zawng zawng inelna Nexa MBBA Season Opening 2023 khelh zawh takah Khatla TBL an champion. TBL hian nomawi inchuhnaah Zarkawt BCA chu 78-70 a hnehin an chungnung ber.

Hawla Indoor Stadium, Republic Vengthlanga inkhelah TBL tan Vanlalṭhazuala a hmuhnawm a, coach H. Lalhruaitluanga'n a naute nghet takin a remkhawm thei a, a tawp lamah BCA lamin nawr na deuh mah se an ṭang tlang.

TBL hian Mizoram Super League hnuhnung berah khan Zarkawt BCA hnehin nomawi an chawi, tun season bul ṭannaah Khatla club bawk an chungnung leh a, tualchhung team ṭha pahnih hi na takin an inel chhunzawm leh dawn.

Khatla TBL coach Hruaia chuan, "Zarkawt BCA nen hi chuan kan inel tawk hle, a vannei zawk zawk hi kan tlang ṭhin a ni ber mai, tun ṭumah pawh a vannei zawk kan ni hlauh. Chutihrualin ka beisei angin ka nauten an khel thei a, ka lawm takzet.

"Kan team hi chuan thlawptu kan nei ṭha ṭhin a, tun ṭumah pawh min ṭawiawmtute kha kan chakna hnar an ni," tiin Vanglaini a hrilh a, hlawhtlinna an chan theih nan TBL chhungkaw inpekna a sang tih a sawi bawk.

MBBA Season Opening-ah hian tualchhung team 90 chuang an inlan. MSL club te chu round of 32 aṭangin inlan ṭanin, champion Khatla TBL hian an kalkawngah–BCA, LB Associates, Ramhlun Venglai Pirates, Zembawk leh Chhinga Veng te an hneh.

Khatla TBL hian MSL champion squad an chhawm a, an neih ṭhat sa ho chu an la kawl. An neih sa bakah Ramdinfela (Notea) leh Moses Lalchhuansanga te an neih belh avangin team dang tan elpui hautak an ni dawn.