ICU-ah Van der Sar a awm

Manchester United leh Ajax goalkeeper hlui Edwin van der Sar chu thluaka thisen zam chat (brain haemorrhage) vangin July 7, Zirtawpni khan damdawi inah dah luh a ni. Van der Sar hi ICU-ah a la awm rih dawn a, chawlh a hmanna hmun Croatia-ah enkawl mek a ni.

Kum 52 mi Van der Sar hian inkhelh a chawlhsan hnuin a bul ṭanna club Ajax-ah chief executive hna a thawk a, season liam ta khan an chet ṭhat tawk loh avangin a hna hi a chawlhsan.

Van der Sar tan brain haemorrhage hi thil thar a ni lo a, Man United tana a khelh laiin kum 2009 khan a nupui Annemarie chuan brain haemorrhage hi neiin ngai a awh leh tawh. Kum 2018 khan Man United-a amah enkawltu Sir Alex Ferguson pawhin brain haemorrhage a nei a, a dam ṭha leh tawh bawk.

Khawvel goalkeeper ropui zinga chhiar tel Van der Sar hian Ajax, Juventus, Fulham leh Manchester United bakah Netherlands tan sulhnu ṭha tak a nei. Kum 2011 khan Man United a chhuahsan a, professional football kheh a chawlhsan. Kum 2012 khan Ajax board-ah telin kum 2016 aṭang khan Ajax-ah chief executive hna a thawk.