Man United si ban nghaktu rinawm De Gea a chhuak dawn ta

Manchester United-in David de Gea contract an pawhseisak lo a, Spanish keeper-in Old Trafford a chhuahsan tur thu a tichiang. Kum 32 mi De Gea hian club a nei lo a, chona thar hmachhawn turin a inpeih.

De Gea a chhuah hma hian Phil Jones a chhuak a, Man United squad-ah Sir Alex Ferguson-a hnuaia Premier League nomawi chawi pakhatmah an awm ta lo. Spanish keeper hian kum 12 chhungin Man United match 545 a khel a, clean sheet vawi 190 neiin club record a ni pha ve ve.

Mangṭha le

Social media kaltlangin De Gea hian Man United a chhuah tur thu hi a tichiang a, club chungah lawmthu sawiin club ṭantute a thlah.

De Gea chuan, "Kum 12 chhunga min hmangaihna leh ṭawiawmna zawng zawngah ka lawm hle. Sir Alex Ferguson-a'n min lakluh hnu khan hlawhtlinna ṭha hnem tak kan nei a, Man United kawr ka ha pha hi ka inchhuang a, vannei ka inti bawk.

"Hun duhawm bik leh hriat reng tlak ṭhahnem tak he hmunah hian ka tawng. Madrid chhuahsana helai hmun ka rawn pan khan tuna kan hlawhtlinna ang hi kan chang dun ang tih ka suangtuah pha lo. Tunah erawh chona thar hmachhawn a ṭul. Manchester hi min siam liantu a ni a, tun dinhmun hi ka thlen theihna chhan a ni a, ka theihnghilh ngai tawh lo ang," tiin Manchester United a mangṭha.

Thutlukna huaisen

Manchester United-in Premier League golden glove kawltu keeper De Gea contract an pawtsei lo a, thutlukna huaisen an siam. Club leh player-te hian inremna lailawk nei hman mah se Erik Ten Hag-a'n Spain tana khel pha lo De Gea chungah rinna a nghat ngam tawh lo. Hlawh chungchang inrem loh vang ni bawk mah se Dutch manager mit a tlung tawk loh hi De Gea chhuah chhan ber a ni.

Season thar atan Man United hian training an ṭan leh tawh a, July 12 hian Leeds United nen Ullevaal Stadion-ah an inkhel dawn. Tuna an goalkeeper neih chu Dean Henderson leh Tom Heaton te an ni a, kum upa zawk Heaton-a'n bul a ṭan a rinawm.

Chutihrualin Man United-in season thara rinrawla an duh chu Inter Milan goalkeeper Andre Onana a ni a, Cameroon international chungchangah hian club pahnih hi an inrem hnai.

De Gea chhuah chhan chu a ball sem ṭhat tawk loh vang a ni a, hei hi Onana ṭhatna a ni thung. Pep Guardiola-a'n Man City a zawm tirhin club legend Joe Hart a chhuah tir a, tunah a rah ṭha a lang. Ten Hag-a'n De Gea contract pawtsei lo a, goalkeeper dang a melh hian ṭha a hring ang em tih chu hunin a hril ang.

De Gea - Eng ang chiaha ropui nge?

Manchester United tan kum 12 chhung rinawm taka khel David de Gea hi Premier League goalkeeper zingah eng ang chiaha ropui nge a nih tih chu a tehfung a zir a ni ang.

Goalkeeper ropui tehna tur atana pawimawh nomawi, clean sheet, save leh daih reina hmangin han bihchiang teh ang.

Nomawi

Manchester United tan kum 12 tehmeuh khel mah se De Gea hian nomawi a chawi tam tawk lo. Sir Alex Ferugson-a hnuaiah 2012-13 season khan Premier League nomawi a chawi a, kha kha league nomawi a chawi awmchhun a ni.

Chutihrualin Man United treble champion puitu Peter Schmeichel leh Man City treble champion puitu Ederson ten league nomawi panga ve ve an chawi. Brazilian keeper Ederson hian nomawi tam zawk a la chawi ngei bawk ang.

De Gea hian league nomawi bakah hian FA Cup nomawi pakhat, League Cup nomawi pahnih leh Europa League pakhat a chawi. Schmeichel leh Ederson te record thlirin a tenau deuh.

Clean sheets

Goalkeeper statistics atana pawimawh chu clean sheet a ni a, Premier League-ah De Gea aia clean sheet ngah pathum chauh an awm.

Chelsea leh Arsenal keeper hlui Petr Cech khan ṭum 202 zet clean sheet a nei a, Jose Mourinho hnuaia Blues keeper a ni bawk nen record a nei ṭha fal hle. Indian Super League-ah pawh rawn khel tawh David James-a'n clean sheet vawi 169 a nei a; James hi Liverpool, Aston Villa, West Ham, Manchester City leh Portsmouth tana khel tawh a ni.

Australian goalkeeper Mark Schwarzer-a'n clean sheet vawi 151 a nei a; Middlesbrough, Fulham, Chelsea leh Leicester keeper hlui hi a sang pathumah a tel phak.

De Gea hian season liam ta khan clean sheet vawi 17 neiin Golden Glove a dawng. Spanish keeper hian clean sheet vawi 147 a nei a, goalkeeper langsar dang David Seaman, Nigel Martyn, Pepe Reina, Brad Friedel, Tim Howard leh Edwin van der Sar te chungah a awm.

Club mal chauh thlur chuan De Gea chungah hian Cech chauh a awm a, Czech international keeper hlui hian Chelsea tan 172 clean sheet a nei a ni.

Saves ngah

Kum 2003-04 aṭang khan Premier League hi Opta-in an record a, hemi hma lam hi en tur a awm thei lo. Statistics en let theih chin aṭanga tehin De Gea hi pathumna a ni.

Man United keeper hlui Ben Fosters-a'n Premier League-ah save vawi 1,248 a nei. Wrexham tana khel mek Foster hi a daih rei a, United bakah hian team tenau zawk Watford, Birmingham leh West Brom tana a khelh avangin save hi a ngah ve bawk.

Finland international hlui Jussi Jaaskelainen-a'n Bolton leh West Ham tana khelin save 1,223 a nei. De Gea hian save 1,157 a nei a, match tinah save vawi 2.8 nei ang zel a ni. Spanish keeper hnuaiah hian Schwarzer leh Cech bakah tuna West Ham keeper Lukasz Fabianski te an awm.

Daih rei

Premier League-ah De Gea hi vawi 415 a inlan a, amah aia khel tam chu goalkeeper paruk chauh an awm. Spanish keeper De Gea ropuina chu Man United tana a khelh hma hian Atletico Madrid tan La Liga-ah vawi 57 a khel hman a, tunah hian kum 32 mi chauh a la ni bawk.

England keeper hlui David James (572), Schwarzer (514), Shay Given (451), Brad Friedel (450), Cech (443) leh Jaaskelainen (436) te chauh De Gea chungah hian an awm.

Mimal lawmman

Premier League Golden Gloves hi De Gea hian ṭum hnih a dawng a, 2017-18 season bakah season hman zawh takah khan a dawng. Golden Glove vawi hnih dawng thei hi keeper paruk chauh an la awm.

Cech leh Manchester City keeper hlui Joe Hart ten ṭum li an dawng a, Ederson leh Pepe Reina ten vawi thum dawngin Alisson-a'n vawi hnih a dawng bawk.

De Gea hian Manchester United player of the season awards (2014, 2015, 2016 leh 2018) ṭum li a dawng a, Cristiano Ronaldo nen an dawn zat a inang.

Engtin zel?

De Gea-a'n Man United tan a khelh hnuah goal 426 a chhuah a, chutihrualin goal ngei tura ngaih a hmachhawn chu 467 a ni. Chumi awmzia chu De Gea hian save ṭha bik ṭum 41 a nei tihna a ni.

Hemi hun chhung hian Tottenham keeper Hugo Lloris-a'n save ṭha bik ṭum 48 a nei a, French keeper chauh hi De Gea-a'n hemi hun chhung hian a tluk lo.

Tihsual vanga goal chhuah hi De Gea-a'n ṭum 17 ngawt a nei a, hemi kawngah hian parukna a ni pha. Asmir Begovic chuan record duhawm lo tak neiin a tihsual vangin vawi 25 a chhuah a, Lloris-a'n vawi 24 chhuahin pahnihna a ni pha bawk.

United keeper dang

Premier League awm hnuah Manchester United-in goalkeeper ṭhahnem tak awm mah se langsar pathum an awm. Denmark keeper Schmeichel, Netherlands keeper Edwin Van der Sar leh De Gea te an ni.

Schmeichel leh Van der Sar te hian Champions League nomawi an chawi ve ve a, Danish keeper hian Premier League nomawi vawi nga chawiin Dutch keeper hian vawi li a chawi ve bawk.

Chutihrualin clean sheet bikah erawh De Gea (147) hi Van der Sar leh Schmeichel (128) te chungah a awm thung.