Euro Under-21: England an champion

Kum 40 dawn hnuah England chu European Under-21 champion an ni ve leh ta a, Young Lions hian Europe-a rawlthar football thiam ber ni turin Spain Under-21 chu 1-0 in an hneh.

England tan Curtis Jones chuan first half hun pek belhah inkhela goal awmchhun a khung a, Adjarabet Arena, Batumi-a final inkhelah goal aiin red card kan hmu hnem zawk - England leh Spain player pakhat ve ve hnawhchhuah an ni.

Spain hian hun pek belhah Abel Ruiz-a penalty hmangin si phurh sutna remchang an nei a, mahse, Young Lions keeper James Trafford chuan penalty hi a dang - hun a tawp zui a, England an champion!

England tan hun tawp dawn tawha penalty dangtu Trafford chu fak phu ngawih ngawih a ni a, Spain-in an hun rangkachak an chhawr thei lo chu an thlir nawn fo ang a, an ui vawng vawng ang!

Young Lions

Georgia-a inkhelah England-in bul an ṭan ṭha a, he team hian tlarhmaah player an neih ṭhat avangin attacking game hmuhnawm tak an pho chhuak ṭhin - Young Lions tan hian chance hlauhawma chhal ngam chu Anthony Gordon-a'n a nei hmasa ber a, mahse, Spain keeper Tenas chuan ṭha zetin a dansak.

Gordon bawk kan hmu nawn. Mahse, Morgan Gibbs-White tana duhawm taka a siamsak chu Jon Pacheco lo inrawlh hmanin a lo tibuai a, Spain thinphu a rang ṭhin hle - mahse, La Roja hi an bet reng bik lo.

Villarreal winger duhawm Alex Baena chuan chance ṭha vawi hnih zet a rawn nei a, mahse, season hman zawh taka Spanish club tana inelna hrang hranga goal 12 khungtu hian a hun ṭha neih hi chhawr a harsat.

England lamin chance an neih chhunzawm ve leh a, mahse, Chelsea defender Levi Colwill chuan a hun ṭha neih chu crossbar tauh per nan a hmang - a uiawm takzet.

Boruak a 'hot'

First half hun pek belh minute lina a ni tawh a, goal awm loin team pahnih hi an ṭin tawh mai dawn niin a lang hman. Mahse, Manchester City attacking midfielder Cole Palmer a inlar.

City rawlthar duhawm freekick pet hian Curtis Jones a per a, Spain goalkeeper Arnau Tenas rin loh lama ball a kal avangin England-in goal an khung - hetihlai hian first half hun pek belh minute lina a ni tawh.

Palmer hian a goal khung a lawm uchuak deuh a ni mai thei - Spain lamin a ngaithei lo a, bench lamah buaina a chhuak. England coaching staff zinga mi Ashley Cole leh Spanish fitness coach Carlos Rivera te chu hnawhchhuah ve ve an ni.

Arsenal leh Chelsea defender hlui Ashley Cole hi kum 42 mi ni tawh mah se, inkhelh a chawlhsan hnuah pawh a tha a la za reng niin a lang!

England an vannei

Chawlhlawk hman hnuah Spain-in na takin England an nawr a, mahse, a pawimawh ber goal an khung thei lo. Baena-a cross aṭanga ball kal chu Ruiz chuan tauh lut mah se, offside vangin pawmsak a ni lo.

Portuguese club Braga forward Ruiz hian goal khung theihna chance dang a nei zui a, mahse, six yard vel aṭangin a tauh lut thei lo - Spain-in an an nawr zui a, penalty an hlawh chhuak.

England defender Levi Colwill chuan Ruiz a titlu a, video assistant refere rawn a nih hnuah penalty a chawi - mahse, Young Lions keeper James Trafford chuan a dansak a, England an chak zui.

A vawi hnih nan buaina a chhuak zui a, Spain defensive midfielder Antonio Blanco leh England midfielder Gibbs-White te hnawhchhuah ve ve a ni. England tana pawimawh ber erawh an champion chu a ni.