Haaland-a'n a pet goal lo, Dortmund an chak lo

DFB Pokal aṭanga tla hlim Borussia Dortmund-in Bundesliga-ah Champions League khel tura an elpui Bayer Leverkusen 4-3 in an hneh lo a, Lucien Favre hoten dinhmun siam ṭhatna hun ṭha an bawhpelh.

Leverkusen mual BayArena-ah Erling Braut Haaland-a'n Borussia Dortmund tan bul a ṭan a, goal sarih luhna inkhelah Norwegian goal khung khawlin goal a khung lo.

Chutihrualin Juventus aṭanga loan hmanga hawh Emre Can-a'n Dortmund tana a khel hmasak berah mawi takin a pet goal.

Kum 19 mi Haaland-a'n Dortmund tan a vawi hnih nan bul a ṭan. Norwegian striker Haaland hian Leverkusen a hmachhawn hma hian match li lekah goal riat khungin vawi khatmah a la khel tluan lo a, minute 22 dana goal khung zel ang a ni.

Haaland hian Augsburg lakah minute 34 khelin goal thum a khung a, FC Cologne nen minute 25 khelin goal hnih a khung. Bundesliga-a bul a ṭan hmasak berah Union Berlin nen minute 77 khelin goal hnih a khung a, DFB Pokal-ah Werder Bremen nen minute 45 chhungin goal khat a khung.

Werder Bremen nen hian keeper Jiri Pavlenk-a'n a goal khung tur a dansak a, Haaland-a'n Dortmund kawr a hak hnua a goal khung tur keeper-in an dan hmasak ber a ni a. He inkhel hi DFB Pokal a nih avangin Bundesliga-ah erawh goal zawna a pet tawh phawt chu a goal vek.

Bayer Leverkusen nen erawh Haaland a che ṭha reng ta bik lo, a hun ṭha neih hmasak ber chu goal-ah pet pawp mah se keeper Lukas Hradecky-a'n a dansak. Norwegian striker hian Dortmund tana minute 90 a khelh hmasak berah goal a khung lo.

Bayer Leverkusen tan Kevin Volland-a'n minute 20-naah a khung a, minute hnih hnuah Jadon Sancho corner pet chu Mats Hummels-a'n a tauh lut. Leverkusen bawkin Moussa Diaby goal mawi zet hmangin hma hruai nawnah an inngai a, offside vangin pawm a ni lo.

Dortmund player thar Emre Can-a'n yard 25 aṭangin minute 33-naah goal kilah tak a pet kual lut a, Leverkusen-in minute 43-naah Volland hmang bawkin an siphurh an sut. Second half ṭantirhah Sancho-a'n goal a khung mah se VAR hmanga enlet a nih hnuah substitute Gio Reyna-a'n foul a neih avangin pawm a ni lo.

Rawlthar duhawm Gio Reyna-a'n a tisual siam ṭhatna hun ṭha a nei a, goal ban pet per nan a hmang thung. Leverkusen midfielder lar Kai Havertz-a'n thawm a nei lian lo a, darkar khat hnuah erawh rawn inlarin goal ban a pet per. Dortmund bawkin hma an hruai a, minute 64-naah Achraf Hakimi pass chu Raphael Guerreiro-a'n a pet goal.

Dortmund chak turah inngai hman mah se mualneitu substitute Leon Bailey-a'n Volland pass chu siphurh sut nan a hmang a, minute 81-naah 3-3 a ni. Bayern Leverkusen midfielder Lars Bender-a'n minute 82-naah ṭha zetin chakna goal a tauh zui a, inkhel hmuhnawm takah Dortmund 4-3 in an hneh.