PSG an inthuam ṭha mek, An duh an hlah lo

Nipui tranfser-ah Lionel Messi leh Sergio Ramos nen an inthlah fel tawh a, contract thar ziak duh lo Kylian Mbappe pawh contract thar a ziak lo a nih chuan an hnenah a cham theih loh tur thu an hrilh.

Khawvela footballer man to ber Neymar-a dinhmun pawh a chiang lo nia sawi a ni a, European football thunun tumtu Paris St-Germain hian insiamṭhat chu an tum chiang tih a lang.

Kar hmasa lawk khan khawvel huap pawha coach langsar ni phak Luis Enrique an lak thu an tichiang a, PSG hian transfer bazar-ah player an lalut mawlh mawlh bawk - Real Mallorca aṭangin Lee Kang-in an lalut leh tawh.

PSG hian Lee Kang-in hma hian defender Milan Skriniar, attacking midfielder Marco Asensio leh defensive midfielder Manuel Ugarte an lalut tawh bawk a, French club-in team thar din tumin hma an la mek.

Hello Oppa!

Kum 22 mi Lee Kang-in hian euro maktaduai 22-in PSG hi a zawm a, French champion tan kum nga chhung khel turin contract a ziak bawk - La Liga en ṭhin chuan Lee Kang-in-a'n PSG a zawm hi mak an ti lo ang.

South Korea tana vawi 14 inlan tawh Lee hi Spanish club lar Valencia aṭanga inzir chhuak a ni a, kum 2011 khan Valencia academy a zawm. Kum 2017 thleng academy-ah hian awmin, B team tan a inlan zui a, kum 2018 khan senior team tana a match hmasa ber a khel tawh.

Valencia-ah hian 2021 thleng kha khelin, match 62 a inlansak a, goal thum khungin assist vawi li a nei. January 12, 2019 khan La Liga-a a match hmasa ber khelin, September 2020 khan kum 19 leh ni 207 mi niin, Levante laka 4-2 a an chakna inkhelah assist vawi hnih a nei a, kum 2001 hnua La Liga match khata assist vawi hnih nei thei naupang ber record a siam.

South Korean playmaker hi Valencia hian contract thar zawrh mah se a hnar avangin pre-season-ah transfer list-ah dah a ni a, Valencia-a a contract titawpin Mallorca hi kum 2021 khan a zawm a ni.

Ropuina ram

Lee hian thutlukna a siam sual lo - Mallorca-ah hian a hming a chher zui a, a season hmasa berah che ṭha lua lo mah se, season hman zawh takah khan a theihna tak tak a pholang a,inelna hrang hrangah match 39 khela goal ruk khungin, assist vawi sarih a nei thei.

Real Mallorca playmaker Lee hi a tlan chak leh chet ran bakah a ball thiamna chu a larpui a ni a, mual sir ding leh vei lamah a chhawr theih ve ve bawk avangin a man zat ngaihtuah phei chuan a man hle.

Lee hi FIFA Under-20 World Cup 2020-ah khan Best Player atan thlan a ni a, hemi kumah vek hian AFC Youth Player of the Year niin, Korean FA Young Player of the Year atan thlan a ni bawk.

Kum 22 mi lek ni chunga a sulhnu thlirin Lee hian player ropui ni turin theihna a nei tih a chiang a, Luis Enrique enkawlna hnuaiah eng nge a an dawn, tih chu hunin a hril ang.

Lee a lawm

South Korea international Lee Kang-in chuan, "Paris St-Germain ka zawm thei hi ka lawm takzet. Khawvela player ṭha ber ber engemawzat kawlin, khawvela team lian ber pawl an ni hial ang.

"He chona thar hmachhawn hi ka châk tawh hle a ni," a ti a, French football-ah a theihna pholan hlan a nghakhlel - Mallorca ai chuan a khelhpuite an ṭha tawh zawk dawn a, Lee Kang-in hian a hming a la chher dawn chauh.

Lee chuan nomawi chawi tura France a pan thu sawiin, "A theih ang anga team ṭanpui hi ka thil tum lian ber a ni fo ṭhin. Match zawng zawnga hnehna chang a, nomawi tam thei ang ber chawi tura he team pui tur hian ka lokal a ni," a ti!

South Korean player ṭhangduang chuan, "Player ball ken nuam ti tak, chutianga theihna nei chu ka ni," a ti bawk a, a inringtawk hle.

PSG 'thar' chu

Coach atan Enrique an nei miau a, PSG lakah beiseina a sang a nih pawhin a awm lo hran lo - nipui transfer-ah player pali ngawt an lalut ta bawk a, an squad neih sa nena thlirin bazar chhunzawm miah lo pawh ni se an ṭha tawk tawh! Inter Milan aṭanga free transfer hmanga an lakluh Milan Skriniar ṭhatzia hi Serie A en ṭhin chuan an hre sa a, Inter-ah season ruk hun a hman chhunga match 246 khel thei a ni - hei hian Inter tana a pawimawhzia a hrilhfiah.

Marco Asensio chanchin inhrilh nawn a ngai lo. Real Madrid-a contract hmang zo hlim attacking midfielder hian season hman zawh takah khan match 51 khela goal 12 khungin, assist vawi riat a nei thei.

Euro maktaduai 60 man Manuel Ugarte pawh a theihna a sang thawkhat tih a hriat a, Sporting Lisbon aṭanga an lakluh midfielder hi kum 22 mi chauh niin, Uruguay tan match riat a khel der tawh - coach thar hnuaia PSG indintharna kawngah player pawimawh ni tura beisei a ni.