Best Player Anthony Gordon

January thlaa pound maktaduai 45-a Newcastle United zawmtu Anthony Gordon chu Euro U21-ah Best Player atan thlan a ni a, Magpies ṭantute tan thu hriat nuam a tling ang.

Kum 22 mi winger hian tun inelnaah minute 407 chu khelmual chhungah hun hmangin goal hnih a khung a, assist vawi khat a nei. UEFA Technical Observer panel chuan, "Tournament chhung zawng level sang takah a khel a ni," a ti.

Everton player hlui Gordon chuan, "Ka hlim takzet. Tournament duhawm tak ka khelah ka ngai a, mahse, mimal lawmman ka dawn hi chu ka khelhpuite leh staff te vang a ni.

"Kan team aṭang khan player paruk emaw pasarih emaw chu he award dawng thei hi kan awmin ka hria a, chu chuan kan ṭhatzia a hrilhfiah," a ti a, a ṭhiante zara lawmman dawng a nih thu a sawi.