A hming chu James Trafford

England-in kum 1982 leh 1984 kha Euro Under-21 champion nomawi an lo chawi tawh a, mahse, hemi hnu hian champion leh tawh loin an awm char char - kum 2023-ah an champion leh ta!

Young Lions champion-na kawngah Arsenal rawlthar Emile Smith Rowe, Chelsea defender Levi Colwill, semifinal leh final-a man of the match ni thei Curtis Jones, Liverpool boss Jurgen Klopp-a fachuam Harvey Elliott, Nottingham Forest midfielder Morgan Gibbs-White leh Newcastle United forward Anthony Gordon te chu player langsar an ni.

Mahse, heng zawng zawng kara final-a langsar ber chu James Trafford a ni. Manchester City goalkeeper hian final-ah penalty a dang a, tournament chhung zawngin a che ṭha êm êm bawk - season tharah Burnley tan a khel dawn.

Premier League kai thar Burnley hian pound maktaduai 15-a lei turin City chu inremna an neihpui tawh a, a khelh ṭhat dan a zirin a man hi £19mtd thlenga sang chho thei tur a ni.

Kum 20 mi keeper hian season hman zawh tak kha League One club Bolton Wanderers-ah loan-in hun a hmang a, match 52 a inlansak thei. Euro U21-ah hian goal chhuah miah loin tournament a khar thei!