Harsa takin Swiatek a chak

Hmeichhe tennis world number 1 Iga Swiatek chuan Wimbledon quarterfinal lut turin fiahna hautak a paltlang - a khingpuiin match point vawi hnih a hmuh tawh chu pawtthla letin hnehna a chang hram.

Pathianni zan hmeichhe singles inkhel dangah Victoria Azarenka chu Elina Svitolina lakah a chak lo a, Ukraine leh Russia thlawptu Belarus nula inkhel hi a boruak a sang hle - ram pahnih laka thil thleng chhut chuan a mak hran lo.

Swiatek a tlang

Iga Swiatek tan grass court hi hmun nuam leh thlan awm ber a ni ngai hran lo a, season dangah pawh player hlauhawm leh hmuhnawm ber a nih theihna hmun a ni lo, a tan chuan thil a awlsam vek bik lo a ni.

Kuminah erawh thil a danglam chho mek - Polish nula hian Belinda Bencic chu 6-7 (4-7), 7-6 (7-2), 6-3 in a hneh hram a, seeded pakhatna hi a khingpui lakah hian set la miah loin a zinkawng a tawp teuh hle.

A vawi khat nana Wimbledon quarterfinal lut Swiatek chuan, "Grass court-ah hian hnehna ka chang thei a ni tih hi keimah leh keimah hi ka inhrilh nawn fo a ngai, chumi a nih loh chuan chesual thei reng ka ni," a ti.

Hmabak Svitolina

Wimbledon khelhna hmunpui ber chu Centre Court a ni a, he hmunah hian Swiatek te an inkhel. Court One lamah Svitolina chuan Azarenka chu 2-6, 6-4, 7-6 (11-9) in a lo hneh ve thung - zaninah Swiatek nen an intawng zui ang.

Russia leh Ukraine an indo a, hun rei tak chhung an buai tawh. Ram lian lo leh thil ti thei lo zawk Ukraine chu a tuar nasa tu an ni. British chu Ukraine lam ṭang an ni, inkhelh banah Russia thlawptu Belarus nula Azarenka chu an au el hial - infiamna pawn lam thil a ni tawh.

Ukraine nula Svitolina chuan, "Fa ka neih kha ka hlim ber ni a ni a, chumi dawtah chuan tun ṭuma hnehna ka chan hi a ni ang," tiin a sawi hial a, a tan chuan Russia thlawptu Belarus nula hneh kha a hlu takzet a ni.

Inkhel dang

All England Club chuan player chhuak thar ṭha tak a hmelhriat leh ta. Russian tleirawl, kum 16 mi lek Mirra Andreeva chuan last 16 a inhlangkai - Pathianni zan khan Anastasia Potapova chu 6-2, 7-5 in a hneh.

Andreeva hian tun hmain grass court tournament hi a la khel ngai lo, a inlan hmasak berah sulhnu a hnutchhiah ṭha nghal hle. Last 16-ah nizan khan seeded 25-na Madison Keys nen an inkhel a, result erawh kan hre hman lo.

Inkhel dangah seeded palina Jessica Pegula chuan world number 60 Lesia Tsurenko chu 6-1, 6-3 a hnehin a vawi khat nan quarterfinal a lut a, a match lehpekah chuan French Open finalist Marketa Vondrousova a tum ang.