Chelsea-in Inter dawrna an hnar

Premier League club indinthar mek Chelsea chuan an striker Romelu Lukaku chu man tlawm taka a chhuah an rem ti lo a, loan-a a khelh mekna Inter Milan-in pound maktaduai 23-a lakluh an dilna chu Blues hian an hnawl.

Chelsea hian Lukaku manah hian pound maktaduai 40 aia tlawm pawm an tum lo nia sawi a ni a, hetihlai hian khawthlang media-te chuan Inter hian £30mtd leh a khelh ṭhat dan a zira pek belh turin Chelsea chu dawr nawn an tum niin an tarlang.

Season thara Champions League khel lo tur Chelsea hian kum 2021 nipui lai khan Lukaku hi £97.5mtd-in Inter aṭangin an lei chhuak a, mahse, English club-ah beisei a phak loh hnuin a club hlui Inter-ah bawk loan-in an kirtir.

Chelsea-a season khat a khelh chhunga match 59-a goal 15 khungtu hian season hman zawh takah khan Inter tan season pangngai tak a hmang a, match 37-ah goal 14 khungin assist vawi sarih a nei bawk - Inter-in chelh an duh hi a awm lo hran lo.

Lukaku hi Serie A club tho Juventus leh sum tamna Saudi Arabian club Al Hilal te chuan lakluh tumin an dawr ve ve bawk nia sawi a ni a, mahse, Belgian striker hian a hmangaih hmasa Inter thutlukna a nghak phawt nia sawi a ni.

Chelsea hi coach thar Mauricio Pochettino hnuaiah insiamṭhat an tum mek a, kar hmasa Zirtawpnia media ho a hmachhawn hmasak berah chuan Argentine coach hian Lukaku chu pre-season training tura a in report a rin thu a sawi.

Poch chuan Lukaku nen an inbiak tur thu sawiin, "Chelsea player a la nih reng chuan player dang ang thoin, club-a a rawn kir hunah chuan ka office-ah lokalin, min rawn biak ngei a ngai dawn," a ti a, "Chelsea player a la nih reng chuan..." a tih tel kher avangin Belgian striker hma hun a chiang lo.

Chelsea hi nipui transfer-ah an insiamrem nasa hle. Coach thar an neih piahlamah club player langsar tak tak N'Golo Kante, Edouard Mendy leh Kalidou Koulibaly te chu Sadui lamah kaltirin, Kai Havertz (Arsenal), Mateo Kovacic (Manchester City), Mason Mount (Manchester United), César Azpilicueta (Atletico Madrid), Ruben Loftus-Cheek (AC Milan) leh Tiémoué Bakayoko (free transfer) te chu an chhuahtir tawh a, Christian Pulisic pawh AC Milan nen sawizawm mek a ni.

Anni ho bakah hian Baba Rahman, Hakim Ziyech, Ethan Ampadu, Trevoh Chalobah, Malang Sarr leh Callum Hudson-Odoi te chu nipui transfer-a la chhuak leh tura ngaih an ni bawk.

Hetihrual hian London club hi transfer bazar-ah an che ve reng tho a, Villarreal aṭanga striker Nicolas Jackson lalutin, RB Leipzig chhuanvawr Christopher Nkunku an thlem lut a, kum 18 mi winger Diego Moreira chu Benfica aṭangin free transfer-in an lalut bawk.

Anni bakah hian Brighton & Hove Albion aṭangin Moisés Caicedo chu lakluh tumin an hel reng a, Flamengo midfielder Matheus Franca pawh £20mtd-in an lalut dawn nia sawi a ni a, Southampton defensive midfielder an rim lai Roméo Lavia erawh Liverpool leh Arsenal te nen an inchuh dawn niin a lang.