Set nganaah Rublev a chak hram

Grand Slam a nih hi chuan a boruak a danglam a, a bik takin set nga an khelh phei chuan a entu lam tan a manhla zual ṭhin - Pathianni zan Wimbledon inkhel hmuhnawm bikah Andrey Rublev a chak.

A ding lamah chak takin a tlan a, lak hman tawh loh tura ngaih ball chu a vaw let hram a, beiseina tlemte chauh a neih chu chhawm nung zelin a tawpah Alexander Bublik chu 7-5, 6-3, 6-7 (6), 6-7 (5), 6-4 in a hneh.

Centre Court-ah darkar thum leh minute 17 an inkhelh hnuin Rublev chu a vannei zawk a ni a, a tan chuan Wimbledon quarterfinal a luh vawi khatna a nih avangin a lawmawm zual ngei ang.

Russian tlangval Rublev chuan, "Point ka hmuh dan ṭhenkhat kha chu match dangah ka ti thei tawh kher lo ang, ka tan chuan All England Club-a chawlhkar hnihna in vuak kai hi a lawmawm takzet," a ti.

Seeded pasarihna Rublev hian Grand Slam paliah quarterfinal a lut kim ta vek a, tunlaia player inkhel mek zingah hetiang ti thei pakuana a ni, mahse, a aia sang a la thleng ngai lo thung.

Wimbledon semifinal thleng tur hian Rublev hian vawi sarih champion tawh Novak Djokovic a hmachhawn ngei a ngaih hmel. Pathianni zan khan Djokovic hian Hubert Hurkacz lakah set hnihin hma a hruai a, zan a rei tak avangin an khel zo rih lo a ni.

Inkhel dangah seeded pariatna Jannik Sinner leh seeded ni phak lo Roman Safiullin te chuan an khingpui ve ve hnehin last 16 an paltlang ve bawk. Sinner-a'n Daniel Elahi Galan chu 7-6 (4), 6-4, 6-3 a hnehin Safiullin hian seeded 26-na Denis Shapovalov chu 3-6, 6-3, 6-1, 6-3 in a hneh.

Seeded 21-na Grigor Dimitrov chuan last 16 a inhlangkai ve chiah thung - a khingpui Frances Tiafoe 6-2, 6-3, 6-2 in a hneh. Inrinni zana inkhel ṭan tawh kha Pathianni zanah a zo thei chiah, ruah sur leh zan curfew vangin inkhel a khaihlak ṭhin - a match lehpekah chuan seeded parukna Holger Rune nen an inkhel ang.