Bayern Munich player man to ber tur Kane?

Tottenham Hotspur-in Harry Kane chungchanga Bayern Munich dawrna hmasa an hnawl a, a vawi hnihna pawh nimin khan an hnawl fel leh bawk. Bavarians hi an la beidawng lo a, Kane lakluh an la tum. Bayern-in England captain hi an lalut thei a nih chuan club history-a player man to ber a ni ang.

Kar liam ta khan Bayern hian Kane manah hian euro maktaduai 70 bakah a chet ṭhat dan a zira pawisa pek belh an huam thu an tichiang a, Spurs-in an hnawlsak. German club hian euro maktaduai 80 bakah a chet ṭhat dan a zira pek belh turin Spurs hi an dawr a, English club la lungawi phak hmel lo mah se German club record a ni thei thung.

Bayern player man to ber hi PSG zawmtu Lucas Hernández a ni a, kum 2019 nipui khan euro maktaduai 80-in an lalut. Kane hi Bayern-ah a che ṭha a, German club hian Spurs hi pawisa an pek belh a nih hrim hrim chuan Bavarians player man to ber a ni thei dawn tihna a ni.

Kum 2021 khan Man City-in Kane hi lakluh an lo tum tawh a, euro maktaduai 150 daih pek an inhuam. Mahse, Spurs chairman Daniel Levy-a'n hralh a phal lo. Tun ṭumah pawh hian Levy hian hralh a duh lo a, mahse, Kane hian season khat chauh contract a nei tawh.

Kum 29 mi Kane hian a hmalam hun a la tichiang lo a, Spurs-ah contract thar a ziak thei bawk. Manager Ange Postecoglou hnuaiah Spurs-in player ṭha an lakluh chuan England captain hian season khat London-a cham a, nakkum nipuia free transfer-a chhuah pawh thil awm thei a ni.

Kane hian Spurs chhuahsana Bayern a pan a nih chuan nomawi a chawi ngei a rinawm a, Champions League nomawi thleng pawhin a beisei ngam ang. Chutihrualin Alan Shearer-a Premier League goal khung tam record erawh a him phah rih theih thung.

Nomawi chawi lo mahse...

Harry Kane hian ram leh club tan nomawi a chawi lo a, chutichung chuan club lian duh rawn a ni. English striker hian nomawi ni loin record a nei ṭha.

Kane hi London hmarchhak lama khaw pakhat Walthamstow-ah a piang a, Tottenham Hotspur aṭanga inzir chhuak ni mah se Spurs hmelma Arsenal academy-ah pawh a awm tawh. Gunners hian a thau deuh avangin Kane hi an chhuahtir a, Spurs-ah pawh a tling mai lo - Ridgeway Rovers-ah a inzir leh phawt.

Player ṭha bik ṭhenkhat chu club pakhat tan an rinawm a, 'one-club man' hming vuahin an ngaisang ṭhin hle. Kane erawh a inzir chhuahna Spurs senior team tan a khel pha mai lo a; League One club Leyton Orient, Championship club Millwall leh Leicester City bakah Premier League club Norwich City-ah te intuai hriam turin loan-in a chhuak.

Player danglam bik Paolo Maldini, Francesco Totti, Ryan Giggs, Paul Scholes, Jamie Carragher leh Tony Adams te angin Kane hi one-club man a ni thei lo hrim hrim. Mahse, Kane hian theihna a nei. Millwall tana a khelh ṭum hian Young Player of the Year-ah thlan a ni.

Spurs tan hian kum 21 a nih aṭangin player pawimawh a ni ṭan a, season khata match 30 a khelh tlin hmasak berah league bikah goal 21 a khung nghal. Kane hian season tinin inelna hrang hrangah goal 20 aia tam a khung ziah a, season liam ta khan Spurs che ṭha lo mah se Kane chuan goal 30 a khung pha tho.

Arsenal manager ropui Arsene Wenger meuh pawhin kum 2015 khan Gunners-in Kane an chhuahtir pawi a tih thu a sawi chhuak hial. Tun hnaia England chet ṭhat pawh hi Kane-a captain hnu a ni a, Euro 2020 final a thlenpui bakah kum 2019 khan Nations league-ah pathumna a nihpui bawk.

Nomawi chawi lo mah se Kane hi English chauh ni loin khawvel striker ṭha zingah an sawi tel dawn. Chutihrualin nomawi tel lo chuan Kane hi a ropui tur angin a ropui dawn lo. Alan Shearer-a'n Newcastle United-a champion pui lo nachungin Premier League-ah Blackburn Rovers a champion pui. Sir Alex Ferguson-a sawmna hnawlin Shearer hian Magpies thlang lo phei se chuan tun aiin a ropui ngei ang.

Kane hi tun thla ni 28 hian kum 30 a tling dawn a, hun ṭha a ngah tawh lo. English striker ṭha mi hian a chanchin an sawi apiang a, 'nomawi chawi lo mah se' tih sawi tel reng a ngaih loh nan Spurs a chhuahsan mai hi a ṭul a ni.