Canada Open champion Lakshya Sen

India tlangval badminton khel thiam Lakshya Sen chu Pathianni zana khelh zawh tak Canada Open-ah a champion a, hmeichhe lamah PV Sindhu erawh semifinal-ah a zinkawng a tawp thung.

Commonwealth Games champion Lakshya Sen-a hian BWF Super 500 title la tur hian Chinese tlangval Li Shi Feng chu 21-18, 22-20 in a hneh a, final inkhel hmuhnawm takah hian game hnihnaah 16-20 in hniam zawk hman mah se a pawtthla thei a ni.

Kum 2022 khan Indian Open-ah Sen-a hi a lo champion tawh bawk a, tunah chuan a pahnih nan Super 5000 title a la ve ta tihna a ni - season hmasa lama Commonwealth Games title a lak nen sulhnu a nei ṭha ta hle.

Uttarakhand tlangval, kum 21 mi chauh la ni Sen-a chuan, "Champion nih a hlu a, a bik takin tournament kan khelhte hi Paris Olympic qualifier atana pawimawh a nih nghal zel tawh avangin boruak pawh a danglam.

"Player ṭha tak tak an inlan a, chung zinga champion nih chu ka ngaihlu hle," a ti a, mimal hlawhtlinna chu thuhran ni se India tihmingṭhatu nih chu a thil tum leh ngaihpawimawh a ni tih a sawi tel.