PSG defender thar Lucas Hernandez

Paris Saint Germain chuan an squad an thuam ṭha mek zel a, defender tawnhriat nei ṭha Lucas Hernandez chu Bayern Munich aṭangin an lalut a, kar hmasa chhung khan player thar panga an lakluhna a ni ta chiah.

Kum 27 mi Hernandez hi pound maktaduai 34 man niin, a contract rei zawng hi kum nga chhung atan tih a ni. France international hi PSG tan tlarhnung lama ban rinawm ni thei tura ngaih a ni.

Bayern Munich chu kum 2019-20 season khan nomawi pathum a chawipui a, treble champion an nih theih nan hian Paris Saint Germain ngei mai hi Champions League final-ah an hneh.

Lucas Hernandez chuan, "PSG zawm hi ka châk ṭhin a, hetiang hun remchang hi rei tak chhung ka lo nghak tawh. Ka tan chuan Paris khawpuia team ṭha ber zawm theih chu duhthusam a ni," tiin a sawi.

Russia rama World Cup an khelh ṭum khan Hernandez hi France tan player pawimawh a ni a, an champion a ni. Qatar Wolrd Cup-ah erawh a tir lamah inlan mah se a hliam a, inelna a hmachhawn zui thei ta lo.

Coach thar Luis Enrique an neih hnuah PSG an insingsa nasa hle a, an player neih ṭhat sa pawh chhuahtir an hreh lo. Spanish coach hian a thunun theih tur chin player enkawl a duh niin a lang.

Tun hnaiah Hernandez hma hian Manuel Ugarte, Milan Skriniar, Marco Asensio leh Lee Kang-in te an lalut tawh bawk a, nipui bazar chhung player dang an lak belh a nih pawhin a mak lo ang.

Chutihrualin PSG hian an player ṭha ber Kylian Mbappe chu chân mai thei dinhmunah an ding. Mabppe hian season khat daih chauh contract a nei tawh a, kum khat dang atan pawhsei a tum lo.

Paris club lam chuan a pawtsei lo a nih chuan a thlawna chhuahtir ai chuan, man nei thei a nih laia hralh an duh - a hma hun chingfel tur hian chawlhkar hnih chhung hun an pe a ni - bazar tingaihnawmtu a ni chhunzawm dawn.