I Day Football a hnai

Tualchhung football-in season bul ṭanna atana an khelh Independence Day Football Tournament chu kuminah pawh neih leh a ni dawn. I Day Football hi district hrang hrangah khelh a ni ṭhin a, MFA-in Mizoram Premier League club puala a buatsaih hi ngaihhlut hlawh ber a ni.

MFA buatsaih I Day Football-a MPL club tel tur tan July 21, Zirtawpni thleng MFA Office-ah entry fee Rs 2,000 a pek theih. I Day Football-ah hian Police-in record an nei ṭha fal a, MPL awm hnuah erawh champion harsat mah se Lalbiaksanga Colney kaihhruai Mizoram Police hi champion lai an ni.

I Day Football 2022-ah khan Police hian final-ah Aizawl FC chu Laldawngliana Colney leh Lalbiakhlua te goal hmangin an hneh a ni.