Red Bull leh Verstappen an chungnung

Formula 1 season kal laiah Red Bull leh an driver ṭha mi Max Verstappen te chu midang hmaah an tlan mek zel a, an elpui team dang tana tluk phak rual lohin an tlan fal mek.

Pathianni zana tlan zawh tak British Grand Prix-ah Verstappen a tlan chak ber a, a team tan mellung pawimawh a phun - a hnungah hian tualchhung tlangval Lando Norris chu a thleng.

Red Bull hian season tir lam intlansiak 10 awmah hnehna an chang vek, kum 1988 khan McLaren chuan a tir lam 11 zetah hnehna an lo chang tawh a, record duhawm um phak turin vawi khat chak an la hmabak.

Max a chungnung

Silverstone tlankawngah car intlansiakna sang ber en turin mi 160,000 chuang an pungkhawm a, ruah sur hnua khaw ṭha leh a nih avangin tlankawng hnawng deuh laite chu awm mah se boruak a nuam hle.

Qualifying lama tlan ṭha ber Verstappen chu a hmasa ber aṭangin a tlan chhuak ṭan a, mahse lap khatna lekah Norris chuan a rawn tlan pel a, chesual ve thei tho a ni tih a takin a lang.

Amaherawhchu, vanglai hmang mek Verstappen hi dan reng theih erawh a ni ta chuang lo; lap 15 an tlan tlin chuan 3.1 seconds velin hma a hruai fal leh hman tawh tho a, midang tam um phak theih a ni lo.

Dutch driver Verstappen chuan, "Intlansiak nuam leh ṭha tak a ni. Car ke thlan chungchangah duhthusam chiah lo lai awm mah se, keimah chauh ni loin team pumpuiin hna kan thawk ṭha, a rah a lo lang chhuak," tiin a sawi.

F1 huangah Verstappen hian vawi 43 hnehna a chang tling ta chiah a, tun season chhung bikin vawi riat a chak tling ta a, driver championship table-ah amah hnaih bertu Sergio Perez aiin point 99 teh meuhin hma a hruai fal.

Tualchhung tlangval

Red Bull lamin season hmang ṭha viau mah se Silverstone a nih kha chuan rilruah Lewis Hamilton a lo lang ṭhin a, a vanneih ṭum a nih chuan hnehna a chan ve leh mai tawh rinna pawh a lian.

Mercedes driver Hamilton hi pathumnaah a thleng, amah ang bawka Britain tlangval Norris chu pahnihna a nih avangin a hmuna intlansiak entute mit a tlai tho ang tih chu a chiang.

World champion vawi sarih ni tawh Hamilton hian British Grand Prix bikah a vawi 14 nan dawhsan (podium) a lawn a, hnehna chang ta chiah lo mah se season a hman dan chhut chuan result ṭha a ni.

Chutihrualin, Mercedes driver Hamilton hian Michael Schumacher nen record inṭawm an neih (7 titles) chu kal fal san a duh a nih chuan Red Bull driver-te a um phak a pawimawh dawn ta hle.

Season hmasa aṭang khan Hamilton-a'n chak ni hmel a la hmu ve miah lo, a vanglai pel tawhin F1 huangah a hun hnuhnung lam a hmang mek tawh a, a tan thawhchhuah leh chu thil awlsam a ni tawh lo mai thei.