Christian Pulisic-a'n Milan a pan dawn

Chelsea attacking midfielder Christian Pulisic chuan AC Milan a zawm dawn a, Serie A club hi Chelsea nen an inrem tawh niin khawthlang media-te chuan an tarlang - he thuziak i chhiar meuh chuan official-a puanzar a ni tawh hial mai thei.

Kum 24 mi Pulisic manah hian Milan chuan euro maktaduai 22 an theh chhuak dawn nia sawi a ni a, mahse, €20mtd hi pe phawtin, a bak €2mtd erawh a khelh ṭhat dan a zira la pek belh leh tur a ni.

Milan hian Pulisic hi a hmain an lo dawr tawh a, mahse, Chelsea chuan dollar maktaduai 15.3-a an dawrna chu tlem tiin an lo hnar tawh - tunah erawh an inrem ta a, Captain America hming lem an pek hian Italian club tan a khel dawn.

Pulisic hi Ligue 1 club Lyon pawhin €25mtd-in an dawr a, mahse, American attacking midfielder hian Lyon-a kal a duh loh avangin Chelsea chuan a man tlawm zawka dawrtu Milan lamah an kaltir dawn a ni.

USA international Pulisic hi player theihna nei sang leh kum naupang tak ni mah se Chelsea-ah hian kum khat chiah contract a nei tawh a, a man hi a sang viau thei lo.

Pulisic hian January 2019 khan Borussia Dortmund aṭangin Chelsea hi £58mtd-in inremna a neihpui a, mahse, nipui hma chu loan-in German club-ah hian a khel phawt.

Chelsea a pan hnuah match 145 khela goal 26 khungin, assist vawi 21 a nei a, Champions League, UEFA Super Cup leh FIFA Club World Cup-ah te vawi khat ṭheuh champion nomawi a chawipui.

Mahse, season hman zawh takah khan Blues tan hmun a chang phak meuh lo. Inelna hrang hrangah match 30 khelin goal khat chiah a khung a, assist vawi hnih a nei bawk.

Pulisic hian club tan beisei a phak loh lai pawhin ram tan erawh hmun pawimawh a chang reng a, USA tan match 60 a khelh tawhah goal 25 ngawt khungin assist vawi 16 a nei.

World Cup 2022-ah khan USA-in match li an khelhah bul a ṭan vek a, group stage-a match thum an khelhah vawi hnih chu man of the match a ni thei - goal khat khungin, assist vawi hnih a nei a ni.

2023 CONCACAF Nations League Finals-ah khan Player of the Tournament atan thlan a ni a, US hi Nations League-ah vawi hnih a champion pui tawh - USA hian World Cup 2026 an thleng dawn a, an ram player chhuanvawr khelh zel dan hian an ram World Cup thlen tura an khelh dan a hril thui viau ang.