Shirt sponsor tel loin Chelsea-in jersey tlangzarh

Premier League club insiamthar tum Chelsea-in khelmual pawn lamah chanchin an nei zel a, nimin khan season thar (2023-24) atana an jersey chu kawr hmaa sponsor inziak awm loin an tlangzarh.

Blues hi telecommunications company Three nen kum thum chhung an thawk ho a, mahse, season hman zawh tak zawh rual khan an inremna hi a tawp - contract thar an ziah loh avangin Blues hian sponsor thar an zawng.

London club hian streaming service Paramount+ nen inremna nei mah se Premier League chuan an broadcasting rights chungchanga inremnaaah harsatna a awm thei tih hriain, he inremna hi a kaltlang an phalsak lo.

Premier League hian UK bikah chuan Sky Sports, BT Sport leh Amazon Prime te chu an broadcast partner an ni a, streaming service dangin an club zinga mi an lo thawhpui hi an inremnaah a rem chiah lo niin a lang.

London club hi shirt sponsor chungchangah hian an buai hrim hrim. Pawisa inthapna lam buaipuitu Stake nen pawh indawrna thui tak an kalpui hman a, mahse, fans lamin hei hi an duh loh avangin an inrem leh ta lo.

Premier League chuan pawisa inthapna a dona kawngah heti lam company-ten an league-ah sponsor an neih lohna tura hmalak an tum thu an sawi a, 2025-26 season-ah chuan Premier League club-te kawr hmaah gambling company sponsor hming awm lo tura hmalak an tum.

Hetihlai hian Chelsea-in an indawrna an tihtawp tak Stake erawhin Premier League club Everton leh Championship club Watford-te chu an thawhpui mek tho a, club pahnih kawr hmaah hian Stake.com tih a inziak.

Chelsea hi an jersey bana inziak ṭhin Whalefin nena an thawh hona pawh a tawp a, London club hian hemi kawngah hian engtiang takin nge hma an lak dawn, sawi theih a la ni lo.

Blues hian shirt sponsor tel loa jersey an tlangzarh takah chuan pre-season tour-ah chuan shirt sponsor tel loin an zin ngei dawn niin a lang ta a, August 16-ah an jersey-te hi club website leh dawrah te an zuar chhuak ṭan ang.

Pre-season a Wrexham leh Borussia Dortmund te nena inkhel tur Chelsea hian August 13-ah season thar atana an match hmasa ber an khel dawn a, Stamford Bridge-ah anmahni ang thoa season hman zawh taka beisei phak lo Liverpool nen an inkhel ang - an league match hmasa ber aṭanga ni thumnaah jersey an zuar chhuak dawn chauh tihna a ni.