Newcastle-ah Karius a cham dawn

Champions League 2018 final-a a chetsual hnua ngai awh leh tawh lo Loris Karius chuan Newcastle United-a cham chhunzawm zel turin contract thar a ziak a, Liverpool keeper hlui hian St. James' Park-ah season khat dang a la khel dawn tihna a ni.

Kum 2018-a Liverpool leh Real Madrid ten Champions League final an khelh ṭumin Karius hian Reds tan si ban a nghak a, hetihlai hian khawvela goalkeeper ṭhangduang ber pawl niin Germany tana si ban nghak thei tur zingahte pawh a hming lamrik a ni hial.

Mahse, Champions League final-ah Karius hian vawi hnih ngawt Real chu goal a 'khilai' a, Liverpool hi Real lakah 3-1 in an tlawm phah - hemi hnuah hian Reds tan a inlan leh tawh lo a, a contract a hman zawh hma chu Besiktas leh Union Berlin-ah te loan-a khelhtir a ni.

July 2021 khan Liverpool-ah kir mah se coach Jurgen Klopp-a'n squad-ah a telh tawh lo a, a contract a hman zawh hnuin season hmasa ṭan dawn khan Magpies hi January 2023 thleng atan a zawm.

Newcastle-a a contract hi season tawp thleng pawhsei zui a ni a, Carabao Cup final-a Manchester United an hneh loh ṭuma a inlan kha Newcastle jersey ha chunga a inlan awmchhun a ni.

Mahse, Magpies hian Karius hi number 1 keeper Nick Pope thachhang dawl turin an duh a, contract thar an ziahpui. Kum 31 mi keeper Mark Gillespie chuan St. James' Park-ah hian a contract a pawtsei bawk.

Hetihlai hian Magpies player zinga Newcastle-a cham rei tawh ber Paul Dummett pawhin season khat dang atan contract a ziak thar bawk a, kum kua a nih aṭanga St. James' Park-a hun hmang tawh defender hian season hmasa khan hliam leh thil dang avangin match khat chiah a khel a ni.