Number 1 Alcaraz a tho chhuak

Tennis world number 1 Carlos Alcaraz chuan set hloh hmasa mah se 2021 finalist Matteo Berrettini a hneh let a, season dang zawng aiin Wimbledon a khel fuh mek - tunah chuan quarterfinal hial a lut ta.

Spanish tlangval hian Wimbledon last 16 a paltlang vawi khatna ni tur hian, a khingpui Berrettini hi 3-6, 6-3, 6-3, 6-3 in a hneh, a match lehpek atan zanin hian Holger Rune nen an inkhel leh ang.

Rune hian inkhel dangah Bulgarian tlangval Grigor Dimitrov chu 3-6, 7-6 (8-6), 7-6 (7-4), 6-3 in a lo hneh ve thung. Champion lai Novak Djokovic pawh a tlang a, final hma chuan Alcaraz nen an inhmachhawn thei lo thung a ni.

Djokovic hian 7-6 (8-6), 7-6 (8-6), 4-6, 6-4 in Hubert Hurkacz a hneh a, inkhel dangah seeded pathumna Daniil Medvedev chuan Jiri Lehecka lakah set hniha hma a hruai laiin a khingpui chu hliam vangin a inkhel chhunzawm thei lo.

Grass a hmang thiam!

Spain ramah chuan tennis khelh nan clay court an hmang a, world number 1 Alcaraz pawh hi Murcia aṭanga inzir chhuak niin hei hi clay court hmanna hmun a ni - tun hmain All England Club hi a ngaina tehchiam ngai lo.

Wimbledon inbuatsaih nan hian Queen's Club Tennis Championship-ah a inlan a, grass court bika tournament a khelh vawi thumna chauh a ni a, a champion vawi khatna a ni bawk.

Inelna lian an khel zui a, quarterfinal hial a thleng leh ta. A hneh tak Berrettini hi grass-ah chuan player hlauhawm berte zinga mi a ni, chutihrualin hliam damkawr a nih avangin ngai a la awh tawk lo tih a lang.

Kum 20 mi Alcaraz chuan, "Matteo kha player ṭha leh hlauhawm a ni tih ka hre lawk, a bik takin set khatna ka hloh hnu phei kha chuan rilru a hah duh hle. Ka thil tum leh hma thlir tidanglam loa ka hlen chhuak thei kha ka lawm," a ti.

Set hnihna la turin a khingpui service vawi khat chhuhsak a tawk a, set hnuhnung pahnihah pawh a service a hum ṭhain a dinhmun a sawhnghet a, darkar thum leh minute nga an khelh zawh meuh chuan a chungnung zawk.

Hmabak Rune

Wimbledon khelh ṭan tirh khan Alcaraz hian amah chauh hi tun laia ṭhangthar player chhuak thar ṭha a nih loh thu a sawi a, amah ang bawka ṭha zingah Rune a tel thu a sawi - player pahnih hi kum 20 ve ve an ni.

Alcaraz leh Rune te hi an inrual a, kum 12 mi chauh an nih lai pawh khan tournament an lo hmachhawn dun tawh, tunah chuan Wimbledon mipa quarterfinal-a kum 21 hnuai lam pahnih an inhmachhawn vawi khatna tur a ni ta hial.

Seeded pakhatna Alcaraz chuan, "Wimbledon nomawi chawi hi ka duhthusamte zinga mi a ni a, chu duhthusam chu kuminah hian tihhlawhtlin ngei ka tum, keimah ang bawkin Rune pawhin a tum ang," tiin a sawi.

Player pahnih an intawn hnuhnung ber chu nikum Paris Masters kha a ni a, hliam vangin Alcaraz a inhnukdawk - grass bikah chuan tun ṭum hi an inkhelh vawi khatna tur a ni, sulhnu nei ṭha zawk nih an tum ang.

Denmark tlangval Rune hi awlsam taka paltlang theih a ni ngawt dawn lo, quarterfinal thleng tur hian seeded chang phak player pahnih a hneh thei a, tun ṭumah hian seeded parukna a nih phak avangin champion tura rinkai zingah a tel.