MFA-in zaninah Lianzuala chawimawi dawn

Mizoram Football Association chuan zanin dar 8:30 hian HYVE Aizawl City Hall-ah 'All India Football Federation Player of the Year' Lallianzuala Chhangte lawmpuina leh chawimawina hun a hmang dawn. Lianzuala chawimawina hi Zonet Zawlbuk leh Zonet YouTube channel-ah en theih a ni ang.

Kum 26 mi Lianzuala hian football khawvelah sulhnu ṭha tak a nei a, a kum a la naupan avangin hmabak êng tak a nei bawk.

Lianzuala hi Mizoram aiawhin Subroto Cup-ah a khel tawh a, Mizoram Premier League-a Lunglei FC an tlin theih nan qualifier-ah a che ṭha viau bawk.

Kum 2014 khan Lianzuala hi DSK Shivajians's Liverpool International Football Academy-a a tlin avangin MPL erawh a khel hman ta lo.

DSK Shivajians-a inzir lai hian India tan khelin Nepal lakah December 27, 2015 khan goal hnih a khung a, kum 18 leh ni 140 mi chauh a ni.

Lianzuala hian a thawhrimna hmanga a theihna tipung chho zelin DSK Shivajians tan I League a khel a, season khat bak I League-ah a khel lo. Lunglei tlangval hian ISL club NorthEast United, Delhi Dynamos, Chennaiyin leh Mumbai City tan a khel zui.

Season liam ta khan Lianzuala hian Mumbai City chu ISL League Winner Shield a chawipui a, goal 10 tehmeuh khung bawkin ISL Hero of the League-a thlan a ni.

Lianzuala hian India chu Tri-Nation Series-ah a champion pui a, best player-ah an thlang. Hemi zawh hian 2023 Hero Intercontinental Cup-ah champion pui lehin Sunil Chhetri nen goal hnih ve ve an khung a, anni aia khung tam an awm lo.

A lungthu kim nan SAFF Championship-ah Lianzuala hian India a champion pui leh a, final-ah Kuwait lakah goal pawimawh khungin penalty shootout-ah goal a khung bawk. India football team-ah Lianzuala hi innghahna a ni pha a, a club khelhna Mumbai City tana a chet ṭhat bawk avangin a phu ang ngeiin AIFF-in Player of the Year chawimawina an hlan a, zaninah MFA-in an chawimawi ve leh ang.