Inkhelh hun sawn hma a ngai - Djokovic

Wimbledon khelh mekah champion lai Novak Djokovic chuan match khelh ṭan hun chu sawn hma ngaia a hriat thu a sawi a, hei hi zan khata match khelh zawh hman loh a tam ṭhin vang a ni.

England rama tlai dar 5:30 hian Court One-ah inkhel an ṭan a, stadium ṭha ber Centre Court-ah chuan tlai dar 6:00-ah an ṭan chauh ṭhin - London khawpuiah hian zan/zing dar 3:30 AM hnu lam chu 'curfew' vangin an khelh zawm ngai lo.

Tennis khelh rei zawng a inang lo a, inkhel inhnehtawk tak leh tie break khelh tamna match chu a rei bik. Stadium pahnihte hi player ṭha leh langsarte inlan ṭhinna hmun a ni, a tawp lama inkhelte hun tiam chhungin an zo hman meuh lo a ni.

Pathianni zanah Djokovic leh Hubert Hurkacz te an inkhel a, mahse 'curfew' vangin an zo hman lo - Thawhṭanni zanah an khel zo thei chiah, nizan khan Serbian star hian Andrey Rublev a hmachhawn zui leh nghal.

Djokovic hian a match hmasa ṭhenkhat pawh ni khat chhunga khelh zawh hman loh a tuka khelh chhunzawm leh ngai a nei; hei vang hian zan khat hahchawlhna tur a neih theih tura ngaih chu chawl loin a inkhelh zel a ngai ta a ni.

Kum 36 mi Djokovic chuan, "Theih ni se la chuan tlai dar 4:30-ah tal match hmasa khelh ṭan ni se, chu chuan a ṭha zawngin rah ṭha a chhuah ngei ka beisei," a ti, world number 1 thusawi hi a dinhmun aṭanga teh chuan a mak hran lo.

Mahse, All England Lawn Tennis Club CEO Sally Bolton chuan, season thar atan pawh Centre Court hmuna inkhel sawn hma tumna an la nei hran lo tih a lo sawi tawh a, kalphung tidanglam tur erawhin hun a la tam.