Spurs-in Bayern hel lai Kane chelh an duh

Tottenham Hotspur manager thar Ange Postecoglou chuan an striker chhuanvawr Harry Kane chu Spurs-a cham tura a duh thu a sawi a, a player hnenah chuan club tana a hmachhawpte a chhawpchhuah thuai tur thu a sawi.

Khawvela striker langsar ber pawl ni chunga nomawi chawi la nei lo Kane hian Spurs chhuahsan a duh a, kum 29 mi a nih ve tawh avangin English striker hian nomawi chawi miah loa a career mangṭha a hlau.

Kum 2021-a Manchester City pawhin an lo rim hlawhchham tawh striker hi Bayern Munich chuan lakluh an duh a, an dawrna hnuhnung berah chuan pound maktaduai 70-in an ngam nia sawi a ni.

Mahse, Postecoglou chuan, "Kane hi khawvela striker ṭha ber pawl a ni a, he hmunah hian a awm ve zel ka duh a ni," a ti a, tuna a lan danah chuan Spurs-in English striker hi chhuahtir an tum lo.

Hmachhawp chu

Spurs hian vawiinah training an ṭan dawn a, Kane pawhin vawiinah training hi a zawm tura ngaih a ni. London club hian Australia, Thailand leh Singapore-ah te match thum khelin pre-season tour an nei dawn.

Ruahman dan chuan Australia-ah hian West Ham nen an inkhel ang a, Thailand-ah Leicester City nena inkhelin, Singapore-ah hian Jose Mourinho enkawl AS Roma nen an inkhel ang - match thum hi July thla chhunga khelh vek tur a ni.

Tuna a lan dan chuan pre-season tour-ah pawh Kane hi a tel vek dawn a, Ange hian chhuahtir a tum lo. Celtic boss hlui chuan, "Tuna ka tum ber chu Harry nena inhmelhriat a, he club tana hmachhawp ka neihte hriattir a ni.

"Tin, kei pawhin a duhdante ngaithlain hriatthiam ka tum ang - he club kan hlawhtlinpui theih dan tur hi kan sawi dun dawn bawk a, hei hi ani pawhin a duh ber a ni ang tihah hian rinhlelhna ka nei lo," a ti a, Kane chelh a tum.

Mahse...

Hetihrual hian player hmin turin tih tur tam tak a awm a, Postecoglou chuan Kane a cham ngei dawn tih thuah engmah hotu lam aṭanga tiamkamna a awm loh thu a sawi a, a tawi zawnga sawi chuan Kane hi la chân ve thei tho an ni.

Spurs manager chuan, "Kane hi a cham ngei dawn e, tia min tiamna engmah a awm lo a, chutiang chu ka beisei hran lo bawk. Kei chuan tuna ka thil hriat hmanga hmalak mai hi ka tum chu a ni a, Harry hi ka player a ni mek.

"Player-ten boruak an neih vanglai a nih avanga a hrana ṭhutpui a, titipui hi ka hna pawh ni chiahah ka ngai lo. Tu pawh ang khat veka en ṭhin ka nihna hi miin an hria," a ti a, a squad-ah player 'special' bik an awm loh tur thu a sawi.

Kane hian Spurs tan match 435-ah goal 280 a khung tawh a, club tana goal khung hnem ber record a chelh mek - English striker hian Postecoglou hoa nomawi chawi theih a beisei ang em, tih chu Kane hma hun tichiang tura zawhna pawimawh pakhat a ni.

A harsa dawn

Spurs hian hlawhtlin an duh lo a ni bik lo. Mahse, tun hnaiah ringawt pawh khawvela coach hlawhtling zinga mi Jose Mourinho leh Antonio Conte an ban a, Celtic coach hlui Postecoglou hian Mourinho leh Conte tih theih loh a tithei ang em, tih hi a chhanna pek a harsa tlat!

Postecoglou chuan, "Tuna ka hriat chu Harry hi kan squad-ah a awm a, player dangte nena training nei turin a inpeih tawh a ni. Thil thleng hrang hrang ka ngaihtuah hnem lutuk chuan, team din tura ngaihtuahna ka senna kawngah ka buai thei a ni," a ti a, a fimkhur hle.

Australian coach chuan sawi zawmin, "Kalphung neia team din hi kan hlawhtlinna tur chu a ni a, nakin zela kan team tana ṭha tur ka ngaihtuahna kawngah thil dang intihbuaitir ka tum lo.

"Ka ruahmanna hian mimal ringawt a thlir lo a, a pawimawh ber chu team kan nihna angin eng chen nge thlen kan tum a, chu team-ah chuan tuin nge hmun laili chang ang, tih hi a ni," a ti a, Kane chanchin ringawt inbawhbuai tir a tum lo niin a lang.

Nomawi beiseina

Kum 57 mi Postecoglou hian European football-a club ropui tia sawi tur la enkawl lo mah se team a lo kaihhruai tawhah hlawhtlinna a chang fo a, nomawi lamah a mikhual lo - season hman zawh takah khan Celtic chu domestic treble champion a nihpui.

Postecoglou chuan, "Spurs-ah hian hlawhtlinna tam tak chhar ka duh. Club hnufual lai tak leh season chhe taka hmang zo hlim hi ka enkawl fo a ni," a ti a, Tottenham-in season hman zawh tak hmang ṭha lo mah se dinthar theih a inbeisei.

Australia pawh lo enkawl tawh coach chuan, "He hmuna ka awm chhung chauh ni lo, ka chhuah hnu thleng pawha cham reng tur kalphung nghet din a, team ṭha taka he club siam hi ka duh leh châk ber chu a ni.

"Tuna Spurs dinhmun hian chumi tihlawhtling tur chuan min tiphur zual hle," a ti a, Spurs dinhmun chu amah cho phurtu a nih thu a sawi - kum 2008-a League Cup nomawi an chawi hnuah Spurs hi an champion leh tawh lo.

Tottenham an bazar ‘na’ dawn em?

Harry Kane a chhuak emaw, chhuak lo emaw pawh ni se, Tottenham Hotspur-in tih tur chiang tak an nei a, chu chu squad dinthar a ni - he team hian nipui transfer-ah eng ang takin nge team din an tum, tih chu thil hriat châkawm a ni.

Ange Postecoglou chuan, "Celtic-ah khan kum hnih hun duhawm tak ka hmang a, minute tin mai kha nuam ka ti êm êm. Mahse, chutihrual chuan ka hmaa chona inchhawp kha a hautak êm êm a, a bik takin season bul ṭantirah khan a ni lehzual.

"Dawhtheihna kan neih vang a ni em, ka sawi thei lo a, mipuite hnenah chutianga dawhtheihna nei turin kan ti ngawt thei lo. Celtic-ah khan team thar kan din a, a tirah beisei ang result awm lo mah se, fan-te khan kan hnathawh an hmu a, min thlawp tlat a ni," a ti a, thiam takin Spurs fan-te thlawpna a dil.

Postecoglou chuan sawi zawmin, "Bul kan ṭan ṭha dawn nge, result ṭha lo tak nen bul kan ṭan dawn, ka sawi thei lo. Mahse, ka beiseina leh duhna ber chu fan-te tana beiseina siam a, kawng dik kan zawh tih hriattir hi a ni," a ti.

Spurs hian nipui transfer-ah player pali an lalut tawh. Season khat leh a chanve chhung an hnena loan-a khel sa Dejan Kulusevski chu pound maktaduai 25-in a nghetin an lalut a, Leicester City aṭangin attacking midfielder James Maddison chu £40mtd-in an la bawk.

Empoli aṭangin goalkeeper Guglielmo Vicario chu £16.4mtd-in an lei a, first choice keeper ni lai Hugo Lloris chu chhuak tur anga sawi a ni - kum 26 mi Vicario hi Spurs tan si ban nghaktu ber a ni dawn niin a lang.

Spurs hian January khan Pedro Porro chu Sporting Lisbon aṭangin loan-in an hawh tawh bawk a, nipuiah £39.7mtd-in a nghetin an inlalut - London club hi bazar lo tawp chu an ni lo a, nomawi chawi an la tum ve reng.

Hetihlai hian season hmasaa Napoli lama loan-a an kaltir Tanguy Ndombele pawh Spurs-ah hian a kir leh tawh a, Napoli-ah hian Serie A nomawi a chawi hman - inelna hrang hrangah match 40 ngawt a khel.

Postecoglou chuan, "Ka tan chuan Ndombele hi player ṭha tak a ni a, season hmasaa Serie A champion team zinga tel a nih avangin, kan zinga a awm thei hi kan lawm takzet a ni," a ti a, Spurs-a beisei phak lo hi chhuahtir a tum lo niin a lang.

London club-in engemaw tak chu thlen an tum tih a chiang a, chutihrual chuan an league khelhna hi Premier League a nih miau avangin fan-te tan lawmna tur khawp an la bazar rih lo, tiin a sawi theih.