Mizoin silver leh bronze medal la

National Junior Kyorugi Taekwondo Championship vawi 40-na neih zawk takah Mizo Taekwondoist ten silver medal pakhat leh bronze medal pahnih an la.

Chaltlang tleirawl R. Lalbiaknuami (Taekwondo Academy of Best Friend) chuan silver medal a la. Banglore NCOE-a zir mek Ramdingliani, Chanmari West leh Aizawl Taekwondo Academy zirlai Lalhmingsanga, Ramthar North ten bronze medal ve ve an la bawk.

Silver medal latu Biaknuami hian a match hmasa pathumah - Chandigarh, West Bengal leh Karnataka aiawhte chu straight vekin a hneh a, semifinal-ah Uttarakhand a hneh hnuin final-ah erawh Gujarat mi lakah a vanduai zawkah a ṭang.

Under 52kg huangah Chanmari West tleirawl Ramdingliani chuan Manipur, Uttar Pradesh leh Goa te a hneh a, semifinal-ah a thlengtu Karnataka a ngam lo. Lalhmingsanga (under 59kg) pawhin Uttarakhand, J&K leh Kerela te a hneh hnuin Punjab lakah a vanduai a ni.

Mizoram team hi hmeichia pali mipa paruk an ni a, coach Lalinpuia, Armed Veng South (TABF) leh manager Lalsangzuali, Tuikual ten an hruai a ni. C. Lalzuitlunga, Mission Vengthlang chu technical official a ni bawk.

Medal bronze medal latu Lalhmingsanga leh khel ṭha ve tak Robert Muanthansanga te chuan India Academy ṭha - Peace Academy, Delhi an zawm nghal dawn. Silver medal latu R.Lalbiaknuami chuan Champion of Champion Match khel turin Hyderabad a pan zui nghal ang a. Bronze medalist Ramdingliani chuan Bangalore SAI a pan bawk ang.