Rybakina hmachhawn tur Ons Jabeur

Wimbledon hmeichhe singles lamah season hmasa final-a intawngte an inhmachhawn leh dawn, kuminah erawh final a la ni rih lo - zanin hian champion lai Elena Rybakina leh Ons Jabeur ten quarterfinal an khel ang.

Thawhṭanni zan last 16 inkhelah Jabeur chuan a khingpui Petra Kvitova lakah harsatna a tawk lo. Tunisian star hian Wimbledon vawi hnih champion tawh hi 6-0, 6-3 in a hneh.

Champion lai Rybakina pawhin harsatna a tawk lo, seeded 13-na Beatriz Haddad Maia nen game nga chauh an khel tling hman, set khat pawh a zo hman lo tihna a ni - Haddad Maia hi hliam vangin a inkhel chhunzawm thei lo.

Phuba lakna remchang

Centre Court-a inkhelah Jabeur hi rinkai zawk a ni lem lo, seeded parukna hian tun hmain Kvitova hi vawi nga a hmachhawn tawh a, ṭum li ngawt a chak lo zawkah a aṭng - an intawn tawhna zingah Wimbledon 2019 pawh a tel.

Mahse, tun ṭumah erawh a tir aṭanga a tawp thlengin a chungnung hle a, grass court-ah a zawna match riat a chakna ni tur hian game thum chiah a hloh, season hmasa lama a ngam loh Rybakina hmachhawn tur pawhin a inringtawk dawn.

Kum 28 mi Jabeur chuan, "Season hmasa final kha chu a harsa, ka chak loh avangin hrehawm pawh ka ti hle. Tunah chuan ka tan phuba lakna remchang a ni dawn," a ti. Nikum final-ah khan rinkai ni mah se 3-6, 6-2, 6-2 in a chak lo.

Vanneihna

Grand Slam hi chu tournament dangte aiin a danglam, a khelh hun chhung hi tournament dangte let thawka rei a ni. Chawlhkar hnihnaah chuan player tam zawk an chak tawh ṭhin.

Chutiang karah chuan Rybakina tan inkhel hah lutuk loa tlang theih hi thil lawmawm tak a ni ngei ang, set khatna an khelh laiin Haddad Maia-i hnung a na a, enkawl lailawk ni mah se a khel tluan zui thei ta lo.

Seeded pathumna Rybakina chuan, "Hetianga hnehna chan hi chu thil nuam tak a ni ngai lo, a chhan chu hliam hi chu mitin tawrh theih a ni. Round sang zawk ka lut erawh ka lawm," tiin a sawi.

Sabalenka a la dam

Iga Swiatek leh Rybakina te hming a langsar a, anni pahnih ang bawka khel ṭha leh hlauhawm chu Aryna Sabalenka a ni. Ani hian quarterfinal lut turin Ekaterina Alexandrova chu 6-4, 6-0 in a sawp.

Australian Open champion Sabalenka hian second round-ah khan Varvara Gracheva lakah set a hloh a, a hnu lamah erawh match hnih chhung chu set hloh miah loin a chak leh ta.

Kum 25 mi Sabalenka hian quarterfinal-ah chuan Eastbourne champion Madison Keys a hmachhawn leh dawn, American player Keys hian inkhel dangah Mirra Andreeva a lo hneh ve thung a ni.