'The Unveil' - Messi tlangzarhna!

Major League Soccer club Inter Miami chuan July 17, Thawhṭanni zingah Lionel Messi chu an player a nihna angin an pho chhuak dawn a, he hun hi 'The Unveil' tiin a hming an vuah.

Ruahman dan chuan Messi hi July 16, Pathianni, keini lam sanaa July 17, Thawhṭanni zing dar 5:30 bawr velah tlangzarh tur a ni a, mipui 18,000 lenna Inter Miami khelmual DRV Pink Stadium-ah Inter Miami player angin phochhuah a ni dawn - stadium an khat hneh viau tura ngaih a ni.

Thawhṭanni zinga Messi tlangzarh hun bawr velah hian CONCACAF Gold Cup final khelh a ni dawn bawk a, hei vang hian event lian pahnih a insut buai loh nan Messi tlangzarh hun hi Gold Cup final chawlhlawka hman turin tih a ni dawn, niin khawthlang media-te chuan an tarlang.

Hetiang a nih avang hian MLS thuneitute leh CONCACAF thuneitute chuan indawrna an kalpui mek a, Messi tlangzarhna 'The Unveil' hi Gold Cup final chawlhlawka neih a, mipui en theih tura pekchhuah tum a ni - pawl pahnih chuan hetianga ruahmanna siam hian mipui tam zawkin an en theih phah an beisei.

Inter Miami chuan, 'The Unveil' hi Messi tlangzarhna tur tiin sawi kher lo mah se, Messi bak hetiang programme an hmanpui hi a rinawm chiah lo - Messi hian chawlh a hmang mek a, USA lam hi pan vat tura beisei a ni.

MLS club Inter Miami hian Messi-a'n Barcelona-a a khelhpui ṭhin midfielder Sergio Busquets chu inremna an neihpui tawh a, Barca full back hlui Jordi Alba pawh inremna an neihpui tawh nia sawi a ni a, he thu buatsaih a nih lai hian official taka puanzarna erawh a la awm rih lo.

Khawthlang media tarlan dan chuan Messi bakah hian Busquets chu The Unveil-ah hian phochhuah a ni ve dawn bawk a, Alba erawh a nupui Romarey Ventura chu an fa pathumna hring thei dinhmuna a din reng tawh avangin The Unveil-ah hian a inlan hman dawn lo nia sawi a ni bawk.

Paris Saint-Germain-ah a cham dawn lo tih a chian hnuin Messi hian dawrtu a nei nual a, chung zingah chuan Saudi Arabian club Al-Hilal chu a langsar niin, kum hnih chhunga dollar tluklehdingawn 1.6 hlawh turin an sawm!

Mahse, Messi hian Saudi Pro League lama kal ai chuan Inter Miami zawm a thlang zawk a, MLS club-ah hian kum khatah dollar maktaduai 50 aṭanga 60 inkar a hlawh dawn niin an sawi.

Hei chauh hi a ni lo - MLS thawhpui Apple TV+ leh Adidas aṭangin Messi hian share a nei dawn bawk. Apple hian MLS nen kum 10 chhung thawk dun turin tun hnai khan contract an ziak a, an inremna hi dollar tluklehdingawn 2.5 a tling.

Apple TV+ chuan anmahni kaltlanga MLS enna MLS Season Pass lei an awm apiangin Messi chu share an pe ve zel dawn a, Adidas pawh hian MLS nen an thawhdunna kaltlanga sum an hmuh aṭangin Messi hi share an pe ve dawn bawk.

Hetihlai hian Miami khawpui chu Messi thleng tur hian nasa takin a inpuahchah mek a, Inter Miami neitu zinga mi David Beckham chu a phur fal hle - Miami khawpuia Messi lem lian taka an ziahah chuan a kut a lo thawh ve a, a ha a chei var sak!

Miami khawpuia Messi-a lem lian taka an ziah hi Manchester United midfielder hlui Beckham-a nupui Victoria design nia sawi a ni a, Messi thleng turin Miami hi a khaw phurin an phur a ni ber.