Everton tana khel tur Young

Club nei loa awm mek Ashley Young chuan Everton a zawm dawn a, nizan khan medical a nei - he thuziak i chhiar meuh chuan English player tawnhriat nei ṭha hian a zawm fel tawh hial mai thei.

Kum 38 mi Young hian Villa Park-a a contract hmang zoin, club nei loin a awm mek a, Everton hi a zawm a nih chuan free transfer-in a zawm thei dawn tihna a ni - season hman zawh takah khan Villa tan match 32 a la khel thei a, goal khat a khung.

England tan vawi 39 inlana goal sarih khungtu Young hian Watford aṭanga a professional zinkawng zawh ṭanin, Aston Villa, Manchester United leh Inter Milan tan a lo khel tawh bawk.

Red Devils tan hian Premier League, FA Cup, League Cup, FA Community Shield leh Europa League-ah te vawi khat ṭheuh champion nomawi a chawi a, Inter tan Serie A-ah champion nomawi a chawi bawk - a sulhnu hi a nep lo hle.

Young hian Premier League kai thar Luton Town pawh inbiakna a neihpui a, sum tamna Saudi Pro League lam aṭang pawhin dawrtu a ni. Mahse, a tawpah chuan Everton a thlang ta niin a lang.

Villa tana a khelh hmasak lai, 2008-09 season-a PFA Young Player of the Year-a thlan Young hian winger angin a career a ṭan a, mahse, United-ah wing back anga a hun hmangin tlarhnung lamah a khel tam tawh zawk.

Everton hi manager Sean Dyche hnuaiah insiamṭhat an tum mek. Burnley boss hlui hian January khan Frank Lampard thlakin, Everton a enkawl ṭan a, Merseyside club hi Premier League-ah a inhamtanpui - Young hi Everton boss a nih hnua a player lakluh hmasak ber a ni.