Spurs B Team-in Chelsea an hneh

Tottenham Hotspur-in Carabao Cup round of 16 aṭangin Chelsea an pet chhuak. Frank Lampard-a'n team din thar nan pound maktaduai 200 vel a seng a, Jose Mourinho-a'n a club hlui hi Spurs 'B Team' tia chhal theih hmangin a hneh.

Thawhlehni zana Totten-ham Hotspur Stadium-a inkhelah hian Chelsea-in Timo Werner hmangin minute 19-naah an khung hmasa a, Spurs-in Erik Lamela hmangin minute 83-naah an sut. Hun pangngaiah 1-1 a ni a, penalty hmanga chak zawk zawn niin Blues midfielder Mason Mount chiahin a pet goal lo a, 5-4 in Spurs an chak.

Tottenham Hotspur-in Europa League qualifying an khelh a ngai a, Premier League leh League Cup khelh tur an neih bawk avangin fixtures a hautak hle. Spurs hian September 13 khan Everton hmachhawnin season bul a ṭan a, October 4-a Manchester United nen an inkhelh tur chhiar telin ni 22 chhungin match riat a khelh a ngai dawn.

Mourinho hote an vannei a, Leyton Orient nena an inkhelh tur chu Covid-19 vangin ṭhulh a la ni zawk. Tun hnaiah Spurs fixtures a hautak lehzual. Pathianni liam ta khan Newcastle nen an inhnehtawk a, tun Pathiannia Old Trafford-a an lenluh leh hmain Chelsea leh Maccabi Haifa te an hmachhawn a ṭul. Ni hnih danah Jose Mourinho hote an inlan a, hahchawlhna hman an neih loh avangin Portuguese manager-in team ṭha ber a chhawr thei lo.

Mourinho-a'n bul ṭan turin Harry Kane a dah lo a, inhliam vangin Son Heung-min squad-ah a awm lo a, player langsar pahnih an awm loh avangin a sawi uar nan B Team tia chhal theih a ni. Portuguese manager hian squad-ah Dele Alli a dah lo a, English midfielder nen hian a inkar a ṭha lo nia hriat a ni a, Spurs fixtures hautak a tih harsat belh.

Spurs tan Hugo Lloris; Toby Alderweireld, Eric Dier, Japhet Tanganga; Serge Aurier, Gedson Fernandes, Tanguy Ndombele, Moussa Sissoko, Sergio Reguilon; Steven Bergwijn leh Erik Lamela te an inlan. Striker tiha chhal tur player-in bul an ṭan lo a, chutihrualin Blues ṭantute thlirna aṭang chuan B-Team ni loin A-Team an ni zawk ang.

Frank Lampard-a'n duh thlan tur a ngah. Keeper pathum zing aṭangin an lakluh thar Edouard Mendy a thlang a, defender-ah Leicester aṭanga an lakluh Ben Chilwell a dahlut.

Tlarhmaah Olivier Giroud-a'n bul a ṭan ve ta a, French forward thlawp tur hian German forward Werner, Callum Hudson-Odoi leh Mount te an awm. Midfield-ah Jorginho leh Mateo Kovacic te an awm bawk a, Blues hi an ṭhat dan ber a ni lo chungin Lampard-a'n a pu hlui Mourinho aiin a chhawr ṭhan player a hmang hnem zawk.

Blues-in goal chance an nei hmasa a, Hudson-Odoi-a'n chance ṭha a hlah. Minute 19-naah Werner ke aṭangin goal hmuh tur a awm ta a, German forward hian mawi zetin London club tana a goal hmasa ber a khung.

Chelsea-in inkhel an thunun zawk na chungin goal khungna hun ṭha insiam an harsat. Spurs tan Gedson Fernandes-a'n penalty a hlawh chhuak teuh a, Blues keeper thar Mendy-a'n a tihtur chin a ti ṭha bawk.

Hudson-Odoi leh Werner ten goal an khung belh thei lo a, Spurs-in Harry Kane leh Lucas Moura te an luhtir hnuah goal an sual chhuak. Real Madrid aṭanga an lakluh Reguilon-a cross chu Erik Lamela-a'n minute 83-naah a khung a, goal dang a luh belh lo.

Tottenham keeper Lloris leh Chelsea keeper Mendy ten penalty shootout-ah save an nei lo a, amaherawhchu a tawp bera pettu Mount-a'n goal zawnah a pet lo. Spurs an vannei a, chutihrualin team enkawltu Mourinho-a'n fak a phu.

Spurs bench aṭanga rawn lut Pierre-Emile Hojberg, Moura leh Kane ten penalty an pet vek a, an pet goal vek bawk. Penalty pettu zingah Chelsea forward Werner-a'n penalty a pet lo a, a pet loh chhan hi hun tawp lama a chawntha a chah vang niin an sawi.