McLaren duhsaktu Hamilton

Mercedes driver Lewis Hamilton chuan tun hma lama a awm tawhna McLaren-in tun hnaia hma an rawn sawn leh ta chu lawmawm a ti a, sang tak thleng leh turin duhsakna a hlan.

British Grand Prix tlan zawh takah khan Hamilton hi pathumna a ni - Red Bulll driver Max Verstappen leh McLaren driver Lando Norris te an thleng a, pathumna dinhmun a luah.

Silverstone tlankawnga intlansiak thlir kirin Norris chuan, "Car kan nei ṭha hle a, a nihna takah chuan Red Bull kan tluk ṭep a ni. Tuna kan tlan ang hian chhunzawm kan tum ang," a ti.

British driver Hamilton pawhin McLaren tlan ṭhatzia hi a lo hmuh hmaih lo chiang hle. World champion vawi sarih ni tawh chuan, "Inelna nuam leh hlimawm tak kan nghak chhuak.

"Ka hmaa thlengte pahnih khan theihna an nei sang, chutihrualin car an neih dan chhut chuan McLaren kha an tlan ṭha hleah ka ngai, ka tan pawh elpui tak tak an ni zel dawn niin a lang," a ti.

Hamilton hian kum 2008 khan McLaren car khalh chhungin F1 nomawi a lo chawi tawh a, a hnu lamah McLaren hian car intlansiakna sang bera champion hi an la nei leh ngai lo.

F1 season kal laiah Red Bull an chungnung a, team dang tan hmun an la kian miah lo. July 23, Pathianni zan dar 6:30 hian Hungarian GP an tlan leh dawn - Mercedes leh McLaren te hi hnawk phak tura ngaih an ni.