Second Division Playoff : Vawiinah Lammualah chinfel a ni dawn

Aizawl DFA buatsaih Second Division khel tur zawnna Playoff chu vawiin hian Lammualah khelh zawh a ni dawn. Hmun ruak pali awmah Tuithiang FC chauh an la tling a, hmun ruak pathum inchuhna boruak a sang ang.

Group A-ah Tuithiang an tlin tawh laiin Reuben FC an tla tawh a, team pahnih hi 11:30-ah an inhmachhawn dawn. Result-in nghawng lian tham a nei tawh lo. Inkhel tur pawimawh zawk erawh zing dar 8:00-a Aizawl South FA leh Ramhlun Vengthar FC te inkhel tur a ni. Team pahnihin point thum ve ve an hmu a, goal difference nei ṭha zawk Ramhlun Vengthar tan draw a tawk. Chutihrualin Aizawl South FA hi coach Lalsangzuala Hmar academy a ni a, Ramhlun Vengthar tan hna a la awlsam lo.

Group B-ah hmahruaitu Armed Veng leh an hnuai chiaha awm Mission Vengthlang FC te an inhmachhawn dawn a, tlai dar 1:00-a inkhel tur hi en châkawm ber a ni. Chutihrualin chawhma dar 10:00-a Orison FC leh Ramhlun FC inkhel result a pawimawh tel ang.

Point la hmu lo Ramhlun FC hi an chak a nih chuan Armed Veng kutah a innghat ang. Armed Vengin MSVT an hneh chuan tlin theihna kawng a inhawng. Orison FC hi an chak thung a nih chuan point ruk an hmu dawn a, tling thei dinhmuna an din rualin inkhel hnuhnung result a pawimawh. Armed Veng, MSVT leh Orision FC te hi point ruk hmu vek thei an ni a, match hmasa pahniha chak Armed Veng hi la vanduai thei an ni.