Mourinho leh Lampard an inchhang

Premier League player ropui ber zinga mi Frank Lampard-a'n club ṭha Chelsea a enkawl a, kum 42 mi lek niin manager ṭha rual nen an inel nghal. English manager hi a season khatnaah Liverpool man-ager Jurgen Klopp nen an inchhang tawh a, season hnihnaah a pu hlui Jose Mourinho nen an inhnial leh ta bawk.

Chelsea-in 1-0 a hma an hruai laiin Lampard-a'n a naute a fuih a, Portuguese manager chuan, "Frank, goal thum inchhuah lai khan i ṭhu reng si," tiin a va kap zauh. Mourinho sawi ang hian Baggies laka Blues 3-0 a an hnufual lai khan naute fuih loin a ṭhu ngawi reng.

Manager pahnih hi mual sirah thinrim takin an inhnial zui a, amaherawhchu inkhel banah erawh boruak a ṭha. Lampard chuan, "A player-te aiin referee te a biak hnem zawk thu ka hrilh. Mual sirah kan infiam ve mai a ni a, Jose hi ka zah em em a ni," tiin inkhelh banah a sawi.

Mourinho pawhin, "Kan thusawi aiin a laka ka rilru put hmang hi a pawimawh zawk. Coach upa zawkin coach beiseiawm tak thurawn ka pe ve mai a ni a, kan team an chak loh laiin player-in min mamawh ṭhin. Kan chak lai erawhin a changtupa ber emaw in tih a ṭul lo.

"An match hnuhnung bera 3-0 a an chak loh laia a ṭhu ngawi kar kha ka khawngaih a, thurawn ka pe. Football ang zawng chuan engmah zirtir tur ka nei lo. Chak loh lai chuan player-te thlawp a pawimawh a, chak lai erawh chuan ṭhut hahdam tur a ni," tiin a player hlui Lampard thurawn a pek thu a sawi.