Rublev hnehtu Djokovic-a hmabak chu Sinner

Wimbledon chuan a vawr tawp a thleng chho mek - champion lai Novak Djokovic hmaah tumah ding zo reng an awm lo. Thawhlehni zan khan Serbian star hian Andrey Rublev chu 4-6, 6-1, 6-4, 6-3 a hnehin semifinal a lut.

Vawi sarih champion tawh Djokovic hian zaninah Jannik Sinner nen semifinal an khel leh dawn, champion hnem lamah Roger Federer nih rual a duh a nih chuan match hnih chak a la hmabak tihna a ni.

Quarterfinal inkhel dangah Sinner hian a khingpui Roman Safiullin chu 6-4, 3-6, 6-2, 6-2 in a hneh ve thung; nizan khan quarterfinal match dang pahnih khelh niin result erawh kan hre hman lo.

Djokovic a nghet

A match hnuhnung pahnihah Djokovic-a'n zan khat chhungin match a khel zo hman lo ve ve a, quarterfinal an khelh dawn hian inkhelh ṭan hun sawn hma mai ṭha a tih thu a sawi hial - a hun sawn ta chiah lo mah se zan khata a khelh zawh hman avangin a lawm ang.

Centre Court-ah Djokovic-a'n ṭantu a nei ṭha, atan chuan Wimbledon quarterfinal hi thil thar a ni tawh lo. World number 7 Rublev tan erawh dai ngai loh ram a ni thung - Russian tlangval hian rin loh takin set khatna chu a la.

Set khatna bikah hian 3-3 a nih hnuah Rublev hian 5-4 a nih hnuah a service hum zuiin set a la a, major tournament bikah quarterfinal a khelh hnuhnung pariata a chak loh vekna chu a siamṭha dawn niin a lang hman.

Mahse, set hnihna aṭang erawh chuan Djokovic-a'n a zia tak tak a lantir, 4-0 ngawta hma hruai falin hnunglam a hawi tawh lo. Set thmuna awlsam takin a la zui a, a hnuhnung berah pawh game hmasa lamah a service chhuhsak lehin nuamsa angreng takin a tlang.

Boruak a nuam

A vawi 46 nan Djokovic-a'n Grand Slam huangah semifinal a lut a, major tournament bikah hian a thiam zual pali zinga tel hnem lamah Roger Federer a nihrual ta chiah a, a la khum chhoh theih pawh a rinawm.

Darkar hnih leh minute 48 chhunga hnehna chang thei Djokovic chuan, "A nihna tak sawi chuan player dangte hian min hneh an chak tih ka hria, chutiang dinhmuna din tak chu ka nuam tih zawng tak a ni ve bawk.

"Grand Slam nomawi chawi zet leh hnehna chan zat te hi chanchinbu lamah ka lo hmu fuh ve ṭhin a, a nuam pawh ka ti. Chutihrualin statistics hi chu number mai a ni a, a ngaihtuah nan hun ka nei tam lo.

"Tournament khel lai ka nih avangin ka match khelh hmabak chauh ka ngaihtuah a ngai, inkhel a hautak tial tial dawn tih pawh ka hria, chuvangin ṭha lehzuala ka khelh a ngai," tiin a sawi a, inelna hmachhawn zinga tawnhriat ngah fal a nih avang erawh chuan a huphurh lo ang.

Sinner tan fiahna

Tunah chuan Jannik Sinner hun a ni dawn - Italian tlangval hi Grand Slam quarterfinal a khelh hnuhnung paliah a chak lo a, tunah chuan a sulhnu ṭha lo thai bo nan Court No 1-ah Roman Safiullin hnehin semifinal a inhlangkai ta.

Italian tlangvalte tan All England Club hi hmun ṭha a ni ngai vak lo, player pathum chauhin semifinal an la lut. Sinner hma hian Nicola Pietrangeli (1960) leh Matteo Berrettini (2021) te hnung a zui ve leh chiah, a hmabak chu Djokovic a la ni dawn zui.

Kum 21 mi Sinner chuan, "Ka tan chuan hnehna hlu tak a ni, tun hun thleng tur hian darkar tam tak chu ka inpumpek tawh. Set hnihnaah khan ka chesual deuh a, a hnu lama ka thawh leh danah ka lawm hle," a ti a, inrintawkna a nei tih a sawi bawk.

Season hmasa khan Wimbledon quarterfinal-ah Djokovic nen an intawng a, set hnih a lak hmasak hnuah a tlawm leh ta zawk. Kuminah chuan semifinal a ni dawn tawh a, nikuma a tawnhriat neih tawhte kha hman ṭangkai a tum ngei ang.