Number 1 Swiatek a chak lo

Wildcard hmanga inlan, a ranking a hniam em avanga seeded ni phak lo Elina Svitolina chuan world number 1 leh seeded pakhatna ni bawk Iga Swiatek hnehin Wimbledon semifinal a lut!

Ukrainian player Svitolina hi tun hma chuan a ranking pawh a lo sang ve tawh ṭhin, number 3 nih lai pawh a nei. Mahse, fa a neih avangin a chawl reng a, kumin April thla khan a lo kir leh chauh - tunah world number 76 a ni phak hram.

A ranking hniam mah se beisei phak baka ṭhain a khel thei a, darkar hnih leh minute 52 chhungin Swiatek chu 7-5, 6-7(5), 6-2 in a hneh. Zanin semifinal-ah chuan Marketa Vondrousova nen an inkhel leh ang.

Mangṭha Swiatek

Mak deuh mai chu - Wimbledon khelh dawn khan Swiatek hi a buk a rit a, hmeichhe player dang tana hmachhawn chakawm loh a ni; Svitolina erawh thleng sang tura beisei a ni lo, nikum October thla lawk khan fa a nei.

Mahse, Polish nula Swiatek tan grass court chu hmun nuam a ni rei thei ngang lo, a match hmasa lamah pawh hnehna chang mah se nuamsa takin a chak hleithei lo, clay court leh hard court lama a khelh dan a phak lo ṭhin hle.

Svitolina erawhin tun tournament chhungin player pang a hneh ta a, a ngam zingah hian Grand Slam champion tawh pali an tel - Swiatek bakah Venus Williams, Sofia Kenin leh Victoria Azarenka te a hneh.

Kum 28 mi Svitolina chuan, "Tournament ṭan dawn khan semifinal ka thleng dawn tih min hrilh se, chumi bakah world number 1 Iga ka hneh dawn tih thu min hrilhtu awm se la, chumi chuan thu atthlak a sawi niah ka ngai ang.

"Mahse, hei tunah chuan a takin a lo thleng dik ta si," a ti. Last 16-a Belarus nula Azarenka a hneh a, ram pahnih inkar boruak avangin a hun tawna hlimawm pahnih a nih hial thu a sawi, fa a neih ṭum chu a hlim lai ber a ni thung a ni.

Pegula hnehtu Vondrousova

Vanduaina leh hun harsa lo thleng ṭhin mah se kian ni a nei a, hun ṭha a lo inherchhuak leh ve ṭhin tih chu a takin kan hmu. Mi rin hlawh lo Marketa Vondrousova chuan champion thei tur zinga mi Jessica Pegula chu 6-4, 2-6, 6-4 in a hneh.

Player pahnih an inkhel tawk hle a, set hnuhnung bera hmangin a tlang tur zawk an chingfel; set thumnaah hian Czech nula Vondrousova hi 4-1 in a hnufual hman, mahse game hnuhnung panga la zawnin hnehna a chang let daih a ni.

Kum 24 mi Vondrousova chuan, "Set hnuhnung berah 4-1 a ni satliah lo, break point a hmuh kha hmang ṭangkai zeuh sela chuan 5-1 a ni thei dawn. Mahse, ka zam duh bik lo, ka hneh let thei ang tih kha ka beisei tlat," tiin a beiseina nung a nei tih a sawi.

Set pathumnaah hian Pegula dinhmun chu a ṭha tehmeuh mai, 3-1 ngawtin a fal. Mahse, ruah sur vangin Court One chung khuhna hman a ni a, hemi hnu lamah hian world number 42 Vondrousova-i chu a chungnung ta zawk.

Chak lo Pegula a vanduai, tun hnai kum hnih chhungin Grand Slam quarterfinal-ah vawi ruk ngawt a chak lo zawkah a ṭang, tournament lianah a hmawr bawk fuh tur chuan a tir lama tha khek a la zir thiam lo tih a lang a, a vannei tawk lo bawk a ni.