India aiawh tur Lalruatfela

Mizo tlangval Lalruatfela chu India aiawhin - Commonwealth Senior, Junior leh Youth Weight-lifting Championship 2023-ah a inlan dawn.

Inelna hi Gautam Buddha University, Greater Noida-ah nimin aṭang khan neih ṭan a ni. Lalruatfela hi 81kg Youth huangah India aiawhin July 14, Zirtawpni hian inlan dawn a ni.

Bungzung tlangval Lalruatfela hian 5th Khelo Youth Games MP khan tuna a inlanna tur category-ah hian silver medal a lo la tawh a, Mizo weightlifting coach Malsawma Khiangte chuan tun ṭumah pawh hian medal an beisei thu Vanglaini a hrilh.

Lalruatfela hian kum 2019 khan Mizoram Weightlifting Academy a zawm a, kumin April thla khan National Centre of Excellence (NCOE), Patiala-a training nei turin an rawn thlang a ni.

India-in a thlen tur Commonwealth Weight-lifting Championship neih lai hian Indian Weightlifting Feferation chuan state tin president leh general secretary ten thu pawimawh an sawi ho nghal dawn; Mizoram Weightlifting Assocaition president Lallianṭhuama leh general secretary Malsawma Khiangte te an kal ang.