FC Bethlehem leh Edgy Sports Management an inrem

Mizoram Premier League aṭanga relegate hlim FC Bethlehem tan chanchin lawmawm a awm a, hun rei tak indawrna an nehpui tawh Edgy Sports Management Solutions LLP nen an inrem a, tun season aṭangin an thawk ho ang.

FC Bethlehem hi MPL aṭanga an tlak avangin Aizawl DFA hnuaiah First Division an khel dawn. First Division-ah club 10 an awm a, FCB bakah hian FC Bethlehem, Sihphir Venghlun FC, Mission Veng FC, Kanan FC, Aizawl FC Academy, Dinthar FC, Bethlehem Vengthlang FC, 1st Bn MAP Football Academy, Ramthar Veng FC leh Tanhril FC te an awm a ni.

Mizo club leh Kolkata-a innghat Edgy Sports inremnaah hian sports promotion, kit leh equipment service hrang hrang bakah marketing, branding leh player management thlengin a tel a, inremna anga an kaltlangpui a nih chuan Bethlehem hamṭhatna tur a ṭhahnem hle.

FC Bethlehem chuan, "Edgy Sports nen hian season hmasa lam aṭang khan kan lo indawr tawh a, tuna kan thawkho thei tur hi kan lawm hle. Sports management lama tawnhriat nei ṭha an ni a, mi dang an lo thawhpui tawhte pawhin hlawhtlinna an lo chang tawh a ni. Anni nen hian Mizoram top flight football-a kir leh theih ngei kan inbeisei a, chu aia sang zawk pawh chu kan thleng theiin kan inring a ni," tiin thuchhuah an siam.

Edgy Sports pawhin, "FC Bethlehem nena inpekna thuk tak nena hun eng emaw chen kan indawr tawh a, inremna kan nei thei hi kan lawm. Veng chhung miten an ṭawiawm ṭha tih kan hria. MPL-a an tla hi pawi kan ti a, chutihrualin Mizorama football inelna sang bera kir pui leh kan inhuam," tiin thuchhuah an siam ve bawk.

FC Bethlehem leh Edgy Sports-te thawhhona hi Mizoram football tan mellung pawimawh tak a ni a, football-a investment a pun chhoh zel hi club leh player tan pawimawh hle.

An inremnaa hian FC Bethlehem 2024-2025 season atan MPL-a a inpet kai leh chuan player zinga pakhat chu Thailand-a club pakhat hnenah trial turin an tir ang a, senso zawng zawng hi Edgy Sports-in an tum vek ang, tih thlengin a awm a ni.