Jannik Sinner: I hre tawh ngai em?

Tennis tuichilh tan Jannik Sinner hriat loh a hun tawh lo a, chutihrualin Grand Slam awm changa en ve zeuh zeuh tan chuan Italian tlangval hi hriat loh pawh awm tak a ni.

Kum 21 mi Sinner hian French Open (2020), Australian Open (2022) leh US Open (2022)-ah te quarterfinal a lut tawh a, kumin Wimbledon-ah semifinal a thleng. Final khel tur zawnnaah hian Sinner hian Novak Djokovic a hmachhawn dawn a, hmabak a hautak dawn hle.

Tu nge Sinner?

Hanspeter leh Siglinde Sinner te nupa inkarah Jannik Sinner hi August 16, 2001 khan a piang a, tennis legend Steffi Graf chawlh aṭanga kum hnihna leh Pete Sampras-a chawlh kumah kumah a piang ve chauh tihna a ni.

Italy hmar lama South Tyrol ram bial chhunga khua Innichen-ah a piang a, a seilenna erawh an khaw bul lawka thingtlang khua Sexten-ah a ni. Sexten hi nipui leh thlasika chawlhna hmun lar tak a ni a, a nu leh pa te hi vura tawlh ṭhinte chawlhbukah eisiamtu leh ei tur petu niin hna an thawk.

Sexten-a mipui cheng 95.37% (2011) hian German ṭawng an hmang a, hei vang hian Italian tlangval Sinner pawh hian Italian leh German ṭawng a thiam a, English a thiam tel bawk.

A pain a tuipui

Johann (Sinner-a pa) hi infiamna tui tak a ni a, hei vang hian a fate pawh an naupan tet aṭangin infiamna lamah an kal hma. Sinner hian kum sarih a nihin tennis a khel ṭan a, kum 8-12 a nihin vur tawlhah (skiing) Italy champion a ni tawh. Tun thleng pawhin Sinner hian vur tawlh hi nuam a la ti a, chawlh laiin vur a tawlh ṭhin.

Italy rama seilian a ni bawk a, football pawh a ngaina hle. Mahse, kum 13 a nihin professional tennis khel turin rilru a siamfel - football leh skiing a ti zui ta lo. An chenna in chhuahsanin Bordighera, Italy a pan a, Italian tennis coach lar Riccardo Piatti leh Massimo Sartori hnuaiah tennis khelh a zir.

Piatti hian kum 2005 leh June 2006 chhung khan Novak Djokovic pawh a lo zirtir tawh a, tennis player lansgsar dang Ivan Ljubicic, Richard Gasquet , Milos Raonic leh Borna Coric te pawh Sartori nen hian an enkawl a ni.

A che ṭha tawk lo

Kum 2016 aṭangin Sinner hian ITF Junior Circuit a khel ṭan a, inelna hi International Tennis Federation (ITF) hnuaia junior tour ngaihhlut ber a ni.

Sinner hi a chet ṭhat tawk loh avangin junior level-ah hian high-level Grade 1 singles vawi khatmah a khel lo a, chutihrualin kum 2017-ah erawh professional tour khel turin a tling.

Italian tennis star hian junior Grand Slam tournaments vawi khatmah a khel lo a, result ṭha a neih loh vangin a khel pha lo. Junior ranking-a a nih san ber pawh number 133-na chauh a ni. Sinner hi rawlthar ṭha ber a ni lo a, chutihrualin talent a neih bakah tumruhna a nei thung.

Hma a sawn

Sinner hian junior inelna a dah pawimawh tawk lo a, 2018 kumtir aṭangin puitling inelnaah (ITF Men's World Tennis Tour) a tel ṭan. Ranking a hniam avangin inelna sangah a tel pha lo a, ATP hnuaia inelna sang ber dawttu ATP Challenger Tour-ah wild card hmangin a tel ve thung.

ITF-ah hian kum khatnaah doubles title chauh a la a, season ranking pawh number 551 daih a ni. Kum 2019 erawh Sinner tan kum ṭha a ni a, February 2019-ah Bergamo-ah kum 17 leh thla ruk mi lek niin ATP Challenger title a la.

Kum 2001-a piang chinah Challenger final lut thei hmasa ber a ni a, Italian zinga Challenger title la hmasa ber a ni. ATP ranking-ah pawh 200 chuanga hma sawnin ranking-ah 324-ah a awm chho.

ITF Futures title pahnih a lak hnuah Sinner hian ATP tournament a khel ṭan a, wild card-a tel Máté Valkusz chu a hneh hmasak ber a ni. Hemi hnu hian Ostrava-ah ATP Challenger final a thleng leh a, noamwi erawh a chawi lo thung.

Season chawhnu lamah Challenger Tour ni loin ATP Tour a khel ṭan a; kum 2019 hian Wimbledon-ah invaw tling lo mah se US Open erawh a khel pha. First round-ah seeded no. 24 Stan Wawrinka a hneh lo. Chutihrualin European Cup-ah semifinal a thleng pha a, ATP Tour-a tel hmasak berah a chet ṭhat avangin ranking-ah 78-na a ni pha. Rafael Nadal (2003) hnua kum tawpa 80-na hnuai lama awm thei naupang ber a ni a, ATP Newcomer of the Year-ah thlan a ni bawk.

A ṭha zinga mi

Kum 2020-ah Sinner hian Australian Open khelin second round a lut a, US Open-ah first round patlang lo mah se French Open-ah quarterfinal a thleng. Season khar nan Sofia Open-ah a champion a, ATP title a lak hmasak ber a ni. Kum tawp ranking-ah pawh hma sawn lehin world number 37 a ni tawh.

Kum 2021-ah bul a ṭan ṭha zui a, Great Ocean Road Open-ah champion nghalin nomawi chawi tura a hneh zingah ranking number 20 Karen Khachanov a tel. Australian Open-ah erawh first round-ah world no. 12 Denis Shapovalov a hneh lo a, set nga an khel tih hriat a ṭha.

Sinner hian mum 2021-ah title pali a la a, masters final lut bawkin season tawp ranking-ah 10-na a ni. Kum 2022-ah Sinner hian Australian Open quarterfinal a thleng a, a hneh loh hi Stefanos Tsitsipas a ni. French Open-ah fourth round a thleng a, khup hliam vangin a khel chhunzawm thei lo.

Wimbledon-ah quarterfinal lut lehin a hneh zingah Stan Wawrinka bakah Mikael Ymer, John Isner leh Carlos Alcaraz te an tel. A hneh loh erawh tun ṭum semifinal-a a hmachhawn tur Novak Djokovic hi a ni a, set nga lai an khel thung. US Open-ah seeded 11-na ni mah se a tawpna chu fourth round a ni.

Italian No. 1

Sinner hi kum 2023 a nih meuh chuan Italy-a tennis player ṭha ber a ni tawh. 2023 Open Sud de France-ah set khat pawh hloh loin nomawi a chawi. Australian Open-ah fourth round chauh a thleng.

2023 ABN AMRO Open-ah Australian Open-a a hneh loh world no. 3 Stefanos Tsitsipas lakah phuba a la a, Stan Wawrinka hneh zui mah se final-ah Daniil Medvedev a hneh lo. French Open-ah seeded pariatna ni mah se beisei pha loin second round-ah a tla.

Kumin Wimbledon-ah Juan Manuel Cerundolo, Diego Schwartzman, Quentin Halys, Daniel Elahi Galan leh Roman Safiullin te hneh tawhin semifinal a thleng a, Grand Slam-a thleng thui ber niin nomawi hial a beisei thei ang.