Tyson Fury hmaah UFC star Francis Ngannou

WBC world heavyweight champion Tyson Fury chuan MMA fighter Francis Ngannou a hmachhawn dawn a, fighter rothap pahnih hi October 28 hian Saudi Arabia-ah an intawng ang.

Team Fury chuan fighter pahnih intawng tur hi exhibition a nih loh tur thu an sawi a, "Professional boxing danin an inhnek ang a, judge pathumin 1-point must system hmangin inhnek hi an endik ang," an ti.

Riyadh khawpuia inhnekah hian Fury hian a kawnghren erawh inchuh turin a chhawp dawn lo a, fighter pahnih tan title inchuh tur a awm dawn lo tihna a ni - a boruak erawh a 'hot' loh phah lo ang.

Chutihruala hriat tur erawh Ngannou hian boxing a la khel ngai lo a, MMA lamah tawnhriat nei ṭha viau mah se ring chhungah eng nge a an dawn tih chu thil hriat châkawm a ni.

Duhthusam

Ngannou chuan boxing match la khel ngai lo mah se ring chhunga Fury hmachhawn chu mumang thleng dik ang mai a nih thu a sawi a, British boxer rothap a hmachhawn thei tur chu a lawm hle.

Cameroonian-French fighter chuan, "Kum thum zet chu Tyson hmachhawn theih hun tur hi thlirin ka lo nghak tawh. Tuna Tyson hnena ka sawi duh erawh hei hi a ni - ring chhungah tlanchhiat a zir a ngai ang.

"A nih loh chuan ka tawkfuh palh ang a, ka tawhfuh chuan a mutthlu nghal mai dawn asin," a ti a, Fury hmaah UFC star hlui hian hlauhthawnna a nei lo.

Nganno hian MMA-ah professional fight vawi 20 hmachhawn tawhin vawi 17 hnehna a chang a, vawi thum a tlawm thung - UFC heavyweight champion lai a ni chungin contract thar a ziak duh lo a, kum 2004-a BJ Pen hnua champion ni lai ni chunga UFC-a contract thar ziak duh lo hmasa ber a ni.

Hei le - Gypsy King

WBC chuan Fury-te inhnekah hian an inhnamhnawih loh tur thu an sawi a, hetihrual hian Fury hi title fight ni lo hmachhawn tur hian a bik takin phalna an pe thung - a kawnghren humhim tura hmachhawn ngei ngei ngai boxer an la awm rih loh vang a ni.

Gypsy King hming lem an pek Fury chuan, "Ka hmaa ding tur hi khawvela hnek na ber a ni hial mai thei. Mahse, Big GK-a'n ka hnek hunah engtin nge a awm dawn, lo thlir reng rawh u," a ti a, MMA star lakah hnehna chan theih a beisei.

Fury hian vawi 34 inhnek hmachhawn tawhin tlawm a la nei miah lo - a hneh zinga 24 ngawt chu a knockout a, vawi kua erawh decision hmangin a chak a, vawi khat draw a nei. A record enin, Ngannou tan hnehna chan ngam beisei a harsa mai thei.

British boxer Fury hian November 2015 khan Wladimir Klitschko chu hnehin, WBA (Super), IBF, WBO leh IBO heavyweight title a hlawh chhuak a, mahse, rilru lamah harsatna a tawh zui avangin Klitschko hnuah hian June 2018 khan a inhnek leh chauh a ni.

A tlanchhia?

Fury-a'n boxing la khel ngai lo Ngannou a hmachhawn dawn a, mi tam tak chuan a zawna Anthony Joshua hnehtu Oleksandr Usyk hmachhawn duh loa tlanchhiaah an puh hial - Fury erawhin hei hi a pha nasa hle.

Usyk hian WBA (Super), IBF, WBO, leh IBO heavyweight title a kawl mek a, Fury nen hian an kawnghren ve ve dahkhamin an inhnek tur anga sawi thawm a ri ring hman hle - mahse, inremna an nei thei tlat lo.

Fury co-promoter Frank Warren chuan, "Tyson hian tumah a tlanchhiatsan lo a, chutianga ngai tan chuan thil awm ang lo tak a ni ang. A chhan maw? Tun boxing khawvelah ani aia heavyweight boxer ṭha an awm tlat lo.

"Boxer ṭha tak tak ka enkawl nual a, mahse, Fury hnaihtu an awm lo. Tun dinhmunah chuan Tyson hi a ṭha ber a ni," a ti a, Fury tan a hmaa ding tur zingah hlauh tur an awm loh thu a sawi.

Buaina pakhat

Usyk hian Saudi Arabia lama hmun nei Skill Challenge Promotions (SCP) chu tun hnai khan contract a ziahpui a, hei vang hian Ukrainian fighter hian eng fight nge a hmachhawn zel dawn hriatthiam a har ve bawk.

Warren chuan he inremna hian an inbiakna a nghawng thu sawiin, Fury vs Usyk hmu tur chuan nakkum tal nghah thlen a ngaih tur thu a sawi - mipuiten an hmuh châk zawk fight chu an la hmu rih dawn lo niin a lang.

Fury thawhpui Warren chuan, "Anmahni hman hun nghaka kan ṭhut reng rikngawt chuan kan buai mai ang a sin. Keini chuan thil nghah ngawt kan thei lo a, kan chet a ngai a ni," a ti a, Usyk nghak loa Ngannou an hmachhawn tur chhan a sawi.

Ukrainian boxer Usyk hian August-ah WBA dan anga a hmachhawn tur Daniel Dubois a hmachhawn a ṭul dawn a, December-ah Fury nen hian an intawn theih a beisei - mahse, October-a Ngannou a hmachhawn chuan Fury tan December-a inhnek leh a harsa dawn.

Ngannou-a beiseina

MMA aṭangin boxing a luhchilh dawn a, Ngannou tan a awlsam dawn lo tih a chiang. Mahse, 'The Predator' hminglem an pek fighter chuan, "Hei hi ka tan chuan ka duhthusamte tihhlawhtlin a, khawvela pa rothap ber ka nihna nemnghehna remchang a ni," a ti.

Kum 2021-a UFC heavyweight chanmpion ni a, hming rawn chher êm êm Ngannou hian January 2022 khan a kawnghren humhim mah se, UFC president Dana White nen an inhmuthiam lo nia sawi niin, contract thar a ziak duh lo.

Ngannou hian MMA leh boxing khelh kawp a duh thu a sawi a, mahse, boxing-ah a hlawhtling kher ang em, tih chu zawhna awm a ni - MMA fighter langsar zingah Conor McGregor, Tyron Woodley leh Anderson Silva te chu ring chhungah an lo hlawhchham tawh.

Hetihlai hian hmeichhe fighter Holly Holm erawh MMA leh boxing-a hlawhtling kawp thei a ni a, boxing-ah world champion kawnghren hlawh chhuak nualin MMA lamah UFC bantamweight champion a ni thei bawk.