Whyte hi ka elpui a ni lo - Joshua

British boxer rothap Anthony Joshua chuan August 12-a a hmachhawn tur Dillian Whyte chu a elpui anga a en loh thu a sawi a, amah chiah a inngaihtuah thu a sawi bawk.

Boxer pahnih hi amateur an nih lai pawhin an lo intawng tawh a, Whyte hian hnehna a chang - professional an nih hnuah intawng lehin, Joshua a chak thung a, a vawi thum nan an intawng leh dawn ta.

Joshua chuan, "Dillian hi ka elpui angin ka en hran lo. Mi pakhat ve mai a ni - mi tam tak chuan min ngaithei lo a ni mai thei. Mahse, kei chuan keimah chiah ka inthlir ṭhin," a ti a, midang dinhmun leh ngaihdanin a tihbuai loh thu a sawi.

Kum 33 mi Joshua hian December thla hian Saudi Arabia-ah Deontay Wilder a hmachhawn leh dawn nia sawi a ni a, mahse, Joshua chuan engmah a sawi lawk duh lo thung.

British boxer chuan, "Wilder hi chu theihnghilh rawh u - Tyson Fury pawh ni se, ka ngaihtuahna hi an lo la peng ve reng ringawt mai a ni. Mi nghakin ka hun ka khawhral ve ngai lo - Dillian hi boxer ṭha tak, hmachhawn huphurhawm tak a ni," a ti.

Kum 35 mi Whyte chuan, "Joshua ṭha ber hmachhawn turin ka inpuahchah tawp mai a ni. Tupawh hneh turin ka ṭha tawk a, hnehna chang tur chauhin ka inngaihtuah. Knockout te chu a lo thleng mai - kei chu ui ang mai ka ni a, midangte hliam châkin ka tuihal reng a ni," a ti a, a inpeih tawh hle.

London khawpuia O2 Arena-ah boxer pahnih hi an intawng dawn a, December 2015-a boxer pahnih intawn hmasakah Joshua hian round sarihna lekah Whyte hi a knockout - WBC International leh Commonwealth heavyweight title a kawl lai a humhim a, British heavyweight title a la bawk.

Whyte a hneh hnuah Olympic gold medallist Joshua hian boxing khawvel thunun chhoin, IBF, WBA, IBO leh WBO heavyweight title hial a la a, mahse, June 2019 khan Andy Ruiz Jr. lakah rin loh takin WBA (Super), IBF, WBO leh IBO heavyweight title a kawl lai chu a hloh.

Joshua hian Ruiz Jr. hi hneh letin, December 2019 khan a title hloh tawhte a nei let a, December 2020 khan Kubrat Pulev lakah a humhim leh bawk.

Mahse, September 2021 khan Oleksandr Usyk ngam loin Joshua hian a title kawlte hi a hloh vek a, August 2022-ah rematch nei mah se split decision hmangin a tlawm nawn.

Joshua hian Usyk a hneh loh nawn hnuah April 2023 khan Jermaine Franklin chu unanimous decision (UD) hmangin a hneh a, Whyte a hmachhawn tur hi kumina inhnek a hmachhawn vawi hnihna tur a ni.

Whyte hian professional boxing-ah vawi 32 fight hmachhawn tawhin, vawi 29 hnehna a chang a, vawi thum a tlawm - vawi 19 chu a khingpui a knockout thei. April 2022 khan Tyson Fury chu a career-a world title a fight vawi khatna ni turin a hmachhawn a, mahse, round rukna lekah technical knockout hmangin a chak. Joshua nena an inanna chu an match hnuhnung berah Jermaine Franklin an hneh ve ve.

Joshua hian vawi 28 fight hmachhawn tawhin vawi 25 hnehna a chang a, vawi thum a tlawm tawh - vawi 22 ngawt a khingpui a knockout thei.