Football zirna E-Pathshala hawng

All India Football Federation (AIFF) leh Sports Authority of India (SAI) ṭang kawpin kum 18 hnuai lamte tana online hmanga football an zirna, E-Pathshala chu nimin khan Mizorama kalpui turin Governor P. Sreedharan Pillai chuan a hawng.

Video conference hmanga hawnna hun buatsaihah hian Mizoram Governor chuan naupan lai aṭanga football zirna kalpui ṭha a tih thu leh, AIFF leh SAI-in hetiang hun an buatsaih chu ṭha a tih thu a sawi a, naupangin hma an sawnpui ngei a beisei thu a sawi.

Thusawitu dang Sports & Youth Services minister Robert Romawia Royte chuan Mizoramah football-in nasa taka hma a sawn thu a sawi a, hmasawntir zel tuma sorkarin ṭan a lak thu leh, infiamna hmunhma ṭha zawk siam belh tura ruahmanna a neih dante a sawi a, AIFF leh SAI hmalakna chuan hna ṭha a thawh a rin thu a sawi.

Dr. G. Kishore, Principal and Regional Director, SAI, LNCPE, Trivandrum bakah Mizoram State Sports Council secretary John Ṭanpuia'n thu an sawi a; Mizoram Football Association honorary secretary Lalnghinglova Hmar chuan he hmalakna hian football-ah hmasawnna a thlen ngei a beisei thu leh, Mizorama District Football Association zawng zawngin a hawnna inkhawm an chhim thute a sawi lang.

Dr. Pradip Dutta, associate professor, SAI, LNCPE Trivandrum-in he hun hi a kaihruai a, AIFF lamin E-Pathshala thil tum leh a kalpui dan tur, a awmzia leh a hlawkna turte an sawifiah a; a tawpah Mizo footballer S Malsawmtluanga (Mama) leh Lalengmawia (Apuia), North East United player-te'n an ngaihdan an sawi bawk a ni.

E-Pathshala hi website a ni a, hetah hian naupang kum 18 hnuai lam mipa leh hmeichhia a duh apiang an inziak lut thei ang. 'Athlete Coaching Program in football for Grassroots and Intermediate' tih a ni a, football kaihhnawih kawng hrang hranga inzirtirna, inawm tleina, hmasawnna tura thiam thil hai chhuahna, naupangin awmze neia football an buaipui theih dan tur leh naupang thiamna hai chhuahna tura duan a ni.

Covid-19 avangin naupangin sikul an la kal lo a, khelmuala chhuaha inkhelh a la remchang vek lo deuh bawk a, hetiang huna in aṭanga an kalpui theih, football lama hmasawnna tura mithiamte duan a ni.

E-Pathshala hi chi thumah ṭhen a ni:  (1) My Football Culture (2) My Skills (3) My Training. 'My Football culture' tih hi hmun ngaah an ṭhen sawm leh a, chutah chuan My drawing, My goal, My Idol, My Creativity leh My story tihte a awm a, naupangin an tih tur hrang hrangte a awm hrang thliah a, hengte hi nuam ti tak chungin an kalpui thei ang a, heng video-te hi an upload leh thei dawn a ni.

“My Skills” hi chu kum 12 hnuai lam tana tih a ni a, an thil tih tur hi a harsat dana zirin - Golden bracket, Silver bracket leh Bronze bracket - tiin ṭhen sawm a ni. Heng hnuaia tih tur a phût hrang hrangte an tih hnuah chutiang thil an tilai video chu upload leh tur a ni.

“My training section” hnuaiah hi chuan an football khel lai leh zirlai video hrang hrang an upload thei a, team-a an khelh mai ni lo ṭhianhoa an inkhel leh chhungkuaa an inkhel laite pawh upload theih a ni ang.

Heng thil hrang hrang an tih kim hnuah website-a an thehluh (upload) hnuah India ram pum aṭanga lutte chu an tihṭhat dan a zirin lawmman siamsak an ni dawn a ni.